भारतं लिहां वःपिं जक १ लाख ३३ द्वः

येँ – देयया थीथी लागाय् चायेका तःगु कोरोना क्वारेन्टाइनय् थौंकन्हय् भारतं लिहां वःपिं मनूत जक १ लाख ३२ हजारम्ह च्वनाच्वंगु तथ्यांक सरकारं सार्वजनिक याःगु दु ।

भारतं वइपिं सकलें नेपाःमितय्त दुकायेगु धकाः सरकारं निर्णय यायेवं थुलिमछि नेपाःमित वइ धइगु अनुमान धाःसा न्हापा मयाःगु खः । थुकिं यानाः क्वारेन्टाइन व्यवस्थापन यायेत थाकुयाच्वंगु दु। भारतं दुहां वइपिं नेपाःमित अप्वयेवं क्वारेन्टाइन नं थौंकन्ह अस्तव्यस्त जुयाच्वंगु दु।

अज्याःगु क्वारेन्टाइनय् च्वनीपिं मनूतय्त १४ न्हु तक च्वनाः नं कोरोनाया छुं संकेत खने मंत धाःसा व १४ न्हु तक नं उपिं सुं न्हूम्ह मनूया सम्पर्कय्म वल धाःसा उमित अथें छेँय् छ्वया बीगु यानाच्वंगु दु ।

तर क्वारेन्टाइनय् तयातःपिं मनूतय्त छुं हे स्वास्थ्य परीक्षण मयासे छेँय् छ्वया हल धकाः गांगामय् धाःसा विरोध शुरु जूगु दु। भारतं वःपिं मनूतय्त स्वास्थ्य परीक्षण मयासे गामय् छ्वया हःगुलिं आः गामय् कोरोना महामारी न्यना वनीगु जुल धासें विरोध याना हःगु खः ।

तर क्वारेन्टाइन व्यवस्थापन यानाच्वंपिं स्वास्थ्यकर्मीतय्सं धाःसा १४ न्हु तक क्वारेन्टाइनय् च्वनाः नं छुं संकेत खने मन्त धाःसा उमित थप परीक्षण यानाच्वनेम्वाः धइगु खँ गामय् थुइके मफुगु कारणं यानाः नं थ्व समस्या वःगु खः धया हःगु दु ।

क्वारेन्टाइनय् नं थौंकन्हय् पीसीआर परीक्षणयात व्यापक रुपं न्ह्याकाच्वंगु दुसा उकिं सुयातं लक्षण खने धाःसा तुरुन्त हे आइसोलेसनय् छ्वयेगु यानाच्वंगु दु। परीक्षणय् संकेत खने दुपिं मनूतय् सम्पर्कय् वल धाःसा उमित हानं परीक्षण यानाः जक छ्वयेगु यानाच्वंगु खँ धाःगु दु। भारतं लिहां वइपिं मनूत अझ थपे जुजुं वयाच्वंगु दनि ।