हेमराज सिरपाः लःल्हात

येँ (नेपालभाषा टाइम्स)÷ नेपालभाषायात ल्यंकेगु खःसा मचांनिसें स्कुलय् नेपालभाषां ब्वंकेमाः धकाः अभियान न्ह्याका वयाच्वनादीम्ह भाषासेवी लिसें उद्योगपति लक्ष्मीदास मानन्धरयात ‘हेमराज सिरपाः’ लःल्हाःगु दु ।

लोकसाहित्य परिषद्ं निदँय् छक्वः बिया वयाच्वंगु संस्कृतिविद्, भाषासेवी, लिपि विशेषज्ञ पं. हेमराज शाक्यया नामं नीस्वनातःगु प्रतिष्ठित सिरपाः मातृभाषा शिक्षायात क्वातुक न्ह्यःने न्ह्याकेगु ज्याय् बिया वयाच्वंगु योगदानयात च्वछासें भाषासेवी मानन्धरयात लःल्हाःगु खः ।

९२ दँया भाजु मानन्धर तुति त्वःधुयाः छेँय् हे आराम यानाच्वनादीगुलिं वय्कःया छेँय् हे जूगु बःचाधंगु समारोहय् मूपाहां शताब्दीपुरुष सत्यमोहन जोशीं दोसल्लां न्ययेकाः, लोकसाहित्य परिषद्या नायः प्रा. प्रेमशान्ति तुलाधरं हनापौ लःल्हानाः व सिरपाःया दाता पं. हेमराज शाक्यका काय सुरेन्द्र शाक्यं दां सिरपाः लःल्हानाः वय्कःयात सम्मान यानादीगु खः । थ्व सिरपाः छगू लख तकाया खः ।

ज्याझ्वलय् न्ववानादिसें भाजु मानन्धरं मांभासं आखः ब्वंकेमाः धयागु झीगु अभियान व आन्दोलन अझं मदिउनि धयादिल ।

सम्बन्धित बुखँ

LEAVE YOUR COMMENTS