थौं मिस्तय् साफ च्याम्पिनसिपया फाइनल
येँ (नेपालभाषा टाइम्स)येँया दशरथ रंगशालाय् जुयाच्वंगु मिस्तय् साफ च्याम्पिनसिप फुटबलया फाइनल कासा थौं सोमवाः जुइत्यंगु दु । मिसा साफ च्याम्पियनसिपया खुक्वःगु संस्करणया फाइनलय् उपाधिया निंतिं नेपाः व बंगलादेशं धेंधेंबल्लाः याइगु जुइ । नेपालं सेमिफाइनलय् भारतयात व बंगलादेशं भुटानयात बुकाः फाइनलय् थाय् दयेकूगु खः । नेपाः न्याक्वखुसी व बंगलादेश निक्वखुसी फाइनलय् थ्यंगु खः । आःतक जूगु न्यागुलिं महिला साफ च्याम्पियनसिपया विजेता भारत नेपाःपाखें पराजित जुइवं धेंधेंबल्लाखं पिने लायेधुंकूगु दु । अथे जुयाः थुगसीया महिला साफ च्याम्पियनसिपय् न्हूम्ह विजेता दइगु निश्चित दु ।
नेपाः व बंगलादेशं समूह चरणया दक्व कासा त्याकाः सेमिफाइनलय् थाय् दयेकूगु खः । समूह चरणय् नेपालं भुटानयात ४–० गोलं व श्रीलंकायात ६–० गोलं बुकूगु खः । अथेहे बंगलादेशं समूह चरणया कासाय् माल्दिभ्सयात ३–० गोलं, पाकिस्तानयात ६–० गोलं व भारतयात ३–० गोलं बुकूगु खः । सेमिफाइनलय् बंगलादेशं भुटानयात ८–० गोलं बुकूगु खःसा नेपालं भारतयात १–० गोलं बुकाः फाइनलय् थाय् दयेकूगु खः । नेपाः व बंगलादेश निगूलिं टिम दक्व कासा त्याकाः छगू नं गोल मनसे फाइनलय् थ्यंगु खः ।
नेपाः व बंगलादेशया दथुइ आःतक न्हय्क्व कासा जुइधुंकूगु दु । थ्व कासाय् बंगलादेशं छक्वः नं नेपाःयात बुकेफुगु मदुनि । नेपालं न्याक्व बंगलादेशयात बुकूगु दुसा निगू कासा बराबरी म्हितूगु दु । साफय् धाःसा नेपाः व बंगलादेश दथुइ निक्व धेंधेंबल्लाः जूगु दु । नेपालं निगुलिं कासाय् बंगलादेशयात बुकूगु खः ।
आइतवाः जूगु प्रि–म्याच कन्फरेन्सय् नेपाःया प्रशिक्षक कुमार थापां उपाधि थःगु हे देशं पित मछ्वयेगु धाःगु दु । भावनात्मक व शारिरक रुपं थःपिंसं मिहेनत यानागु धासें साफया स्टार दुगु जर्सी पुनेगु थःपिनिगु म्हगस दुगु खँ प्रशिक्षक थापां धाःगु खः ।
नेपाःया कप्तान एन्जिला सुब्बा तुम्बापों थःपिं शारीरिक व मानसिक रुपं बाल्लाः धाःगु दु । बंगलादेशया टिम न्हापासिबें बल्लाःगु, भारतसिबें नं बल्लाःगु तर थःपिं नं उतिकं हे बल्लाःगु धासें कप्तान एन्जिलां थःपि त्याइगुलिइ विश्वास प्वंकूगु दु ।
बंगलादेशया प्रशिक्षक गोलो रिब्वाचीं नेपाः बल्लाःगु टिम जूगु तर थःपिं नं उपाधी ल्ह्वनेत तयार दुगु धाःगु दु । फाइनल कासा सोमवाः सनिलया ५ ता इलय् येँया दशरथ रंगशाला जुइ ।
LEAVE YOUR COMMENTS