बेलया उत्कृष्ट गोलय् रियलयात च्याम्पियन्स लिग उपाधी

एजेन्सी- गारेथ बेलं युरोपेली फुटबलया हे छगू उत्कृष्ट गोल यायेवं रियल म्याड्रिड थुगुसीया च्याम्पियन्स लिग उपाधी त्याकेत ताःलाःगु दु । वंगु चान्हय् जूगु कासाय् बेलया निगू गोलया ग्वाहालिं लिभरपुलयात ३–१ गोलं बुकूगु खः ।

बेलं कासाया ६४ औं मिनेटय् उत्कृष्ट ओभरहेड किकपाखें गोल यायेवं रियल २–१ गोलं अग्रता काःगु खः । थ्वयां न्हयव कासाया ५१ औं मिनेटय् करिम बेन्जामां रियलयात अग्रता बिउगु खःसां प्यंगू मिनेट लिपा हे साडिओ मानें गोल यासें लिभरपुलयात बराबरीइ हयाबिउगु खः । कासाया ८३ औं मिनेटय् बेलं हे रियलया निंतिं थप छगू गोल यासें ३–१ या विजय चूलाकाबिउगु खः ।

रियलया थ्व झिंस्वक्वःगु च्याम्पियन्स लिग उपाधी खःसा वंगु स्वदँ न्ह्यवनिसें लगातार उपाधी त्याका वयाच्वंगु दु । झ्वःलाक्क स्वदँयंकं उपाधी त्याकूगु इलय् रियलया प्रशिक्षक जिनेदान जिदान जुयाच्वंगु खः ।

मेखे लिभरपुलया प्रशिक्षक जोर्गन क्लोप धाःसा महत्वपूर्ण धेंधेंबल्लाःया फाइनलय् पराजित जूगु थ्व स्वक्वःखुसी जूगु दु । सन् २०१६ य् लिभरपुल लिग कप व युरोपा लिगया फाइनलय् पराजित जूगु खः ।

सन् १९७६ लिपा रियल युरोपियन कप व च्याम्पियन्स लिग झ्वःलाक्क स्वक्वः स्वक्वः त्याकूगु न्हापांगु टिम नं जुइत ताःलाःगु दु । सन् १९७४ –१९७६ य ब्रायन म्युनिखं नं थथे झ्वःलाक्क स्वक्वः स्वक्वः युरोपियन कप व च्याम्पियन्स लिग त्याकूगु खः ।