चोलेन्द्र शम्शेरयात ‘नजरबन्द’
येँ (नेपालभाषा टाइम्स)÷ निलम्बित प्रधानन्यायाधीश चोलेन्द्र शम्शेर जबरां सर्वोच्च अदालतय् वनेगु कुतः यायेवं सरकारं प्रहरी छ्यलाः पनाबिउगु दु । म्हिगः जबरां थः सर्वोच्च अदालत वयेत्यनागु धकाः खबर छ्वयाहयेवं सरकारं प्रधानन्यायाधीश निवासय् हे प्रहरी तयाः पनाबिउगु खः । अथेहे सर्वोच्च अदालतय् मू लुखाय् नं प्रहरीं कडा पाः बिउगु खः ।
निलम्बित प्रधानन्यायाधीशं अदालत वनेगु खबर छ्वयाहयेवं सरकारं नेपाल प्रहरीयात जबरायात सर्वोच्च अदालतय् दुत मछ्वयेत निर्देशन बिउगु खः । थ्व आदेश वयेवं प्रहरीं प्रधानन्यायाधीश निवासय् हे कडा प्रहरी पाः तयाः जबरायात नजरबन्द थें तयाबिउगु खः । वय्कःया निवासं पिहां वंगु फुक्क गाडीइ हे प्रहरीं कडा चेक यानाः जबरायात निवासं हे पिने मछ्वयेगु रणनीति नालाकाःगु खः ।
निलम्बित प्रधानन्यायाधीश जबरायात महाभियोग तयातःपिं सांसदतय् कार्यकाल क्वायेवं जबरा सर्वोच्चय् लिहां वनेगु तयारी याःगु खः । थःत महाभियोग तयातःगु संसद हे मदयेधुंकूगु अवस्थाय् महाभियोग नं दइमखु धासें जबरा अदालत वनेत्यंगु खः । वय्कलं संसदया अन्त्य लिसें थःत तयातःगु महाभियोग नं भंग जुइगु तर्क तया वयाच्वंगु खःसा वय्कःया थ्व तर्कयात नेपाल बार एशोसियसन, पुलांपिं प्रधानन्यायाधीशपिंसं अस्वीकार याना वयाच्वंगु खः । अथेहे संसद क्वचाये न्ह्यः संसदया महाभियोग सिफारिस समितिं बिउगु प्रतिवेदनय् नं जबरा विरुद्ध महाभियोग तयेमाःगु आधार व कारण दु धयातःगु दु ।
थ्व हे दथुइ सर्वोच्च बारं जबरायात तयातःगु निलम्बन फुकुवा मजूनि धासें जबरायात सर्वोच्च वयेगु पाखें पनेगु निंतिं नेपाल बार एसोसिएसन व सर्वोच्च बारया कानुन व्यवसायीत नं अदालतय् भेला जूगु खः ।
जबरां आइतवाःनिसें नियमित ज्याय् लिहां वयेगु धासें माःगु तयारी यायेत कामु मुख्य रजिष्ट्रार नारायण पन्थीयात निर्देशन बीवं सर्वोच्च प्रशासन, न्यायाधीश व बारया पदाधिकारीतय्सं थः थःगु पुचलय् सहलह ब्याकूगु खः । संसदीय छानविन समितिं महाभियोग लगे जुइगु निष्कर्ष लिसे अभियुक्त तायेकूम्ह व्यक्ति सर्वोच्च अदालतय् लिहां वन धाःसा संविधान व कानुनया सुरक्षा यायेत सरकारं नं भूमिका म्हितेमाःगु निष्कर्ष सहलहया झ्वलय् पिकाःगु खः । व हे निष्कर्ष कथं उमिसं जबरायात पनेत सरकारयात इनाप याःगु खःसा सरकारं सुरक्षाकमीं परिचालन यानाः जबरायात पंगु खः ।
न्यायिक विचलन व भ्रष्टाचारया द्वपं बिसें ९८ सांसदतय्सं वंगु फागुन १ गते प्रतिनिधिसभाय् महाभियोग प्रस्ताव दर्ता यायेवं जबरा निलम्बित जूगु खः । उकथं हे संघीय संसद सचिवालयं जबराया निलम्बन बारे फागुन १ गते पौ च्वयाः जबरायात महाभियोगया कारबाही क्वःमजिउतले थःगु पदं कार्यसम्पादन याये मदइगु ब्यहोरा जानकारी याकूगु खः ।
थ्वहे झ्वलय् नेपाल बार एसोसिएसनया अध्यक्ष गोपालकृष्ण घिमिरें निलम्बित प्रधानन्यायाधीश जबरा अदालतय् लिहां वयेधकाः अदालतयात ‘मजाक’ दयेकूगु खँ धयादीगु दु । वय्कलं धयादीगु दु, ‘जबरा आः हाकनं लिहां वये धयागु खँ हे जुइमखु, थ्व केवल अदालतयात याःगु ‘मजाक’ जक खः, सांसदतय्गु कार्यकाल क्वचाःगु खः, संसदया मखु, संसद मंत धकाः तर्क यानाच्वंगु दु, थ्व गलत खः, संसद अविछिन्न उत्तराधिकारवाला संस्था खः, अथेजुयाः संसद मन्त धयागु जुइमखु ।’
मानवाधिकार आयोग सक्रिय
निलम्बित प्रधानन्यायाधीश जबरां थःगु निवासय् हे प्रहरी परिचालन यायेवं थःत नजरबन्द तःगु व थुकिं सुयातं बांलाइमखुगु प्रतिक्रिया बिउगु दु । थीथी सञ्चार माध्यमय् जबरां थःत नजरबन्दय् तःगु प्रतिक्रिया बीवं राष्ट्रिय मानव अधिकार आयोगं प्रधानन्यायाधीश निवास व सर्वोच्च अदालतय् थः प्रतिनिधि छ्वःगु दु । आयोगं प्रवक्ता लिसे सहसचिव टिकाराम पोखरेलया नेतृत्वय् आयोगया पुचः अनुसन्धानया निंतिं छ्वःगु खः ।
LEAVE YOUR COMMENTS