रविया मन्त्री व सभापति पद मंत, उपचुनाव त्याकाः हानं पदय् लिहां वयेफु
येँ (नेपालभाषा टाइम्स)÷सर्वोच्च अदालतया संवैधानिक इजलासं उपप्रधान लिसें गृमहन्त्री रवि लामिछानेया नागरिकता कायम मजूगु ठहर यासें सांसद पद खारेज जुइगु फैसला याःगु दु ।
अमेरिकी नागरिकता त्याग यायेधुंकाः लामिछानें हाकनं नेपाली नागरिकता कायेगु नितिं प्रक्रिया पूमवंकूगु धासें सांसद जुइत अयोग्य ठहर याःगु खः । सर्वोच्चया फैसला लिपा लामिछानेया सांसद व मन्त्री पद नं मदइगु जूगु दु । लिसें नेपाली नागरिकता हे कायम मजूगु कारणं वय्कः राष्ट्रिय स्वतन्त्र पार्टीया सभापति तकं जुइ मदइगु जूगु दु ।
सर्वोच्च अदालतया कामु प्रधानन्यायाधीश हरिकृष्ण कार्की नेतृत्वय् न्यायाधीशपिं विश्वम्भरप्रसाद श्रेष्ठ, ईश्वर खतिवडा, आनन्दमोहन भट्टराई व अनिल सिन्हया संवैधानिक इजलासं लामिछाने विरुद्ध लाःगु मुद्दाया फैसला यासें नागरिकता कायम मजुइगु ठहर याःगु खः ।
लामिछाने वंगु मंसिर ४ या चुनावय् चितवन–२ पाखें प्रतिनिधिसभा दुजलय् उम्मेदवार जूबलय् हे वय्कः नेपाःया नागरिक मखु धासें उम्मेदवारी खारेज यायेमाःगु माग यासें अधिवक्तापिं रविराज बसौला व युवराज पौडेलं रिट तःगु खः । रिटयात कयाः सर्वोच्चं वंगु पुस २२ गते निगुलिं पक्षयात सहलहया नितिं सःतूगु खः । पुस २२ गते संवैधानिक इजलासं लामिछानेया मुद्दाय् अन्तरिम आदेश बीत अस्वीकार याःगु यासें अन्तिम सुनुवाईया नितिं माघ ११ गते पेश यायेत आदेश बिउगु खः । वंगु माघ ११ गते निसें मुद्दायात कयाः संवैधानिक इजलासय् जूगु बहस लिपा म्हिगः थ्व आदेश बिउगु खः ।
२०५० सालय् येँया सीडीओपाखें वंशजया आधारय् नागरिकता काःम्ह लामिछाने रोजगारीया निंतिं अमेरिका वंगु खः । २०७० फागुन ९ गते अमेरिकी नागरिकता काःगु खःसा फागुन २१ गते अमेरिकी राहदानी काःगु खः । लामिछानें अमेरिकी नागरिकता कायेवं हे नेपाःया नागरिकता कायम मजुइ धुंकूगु खः ।
उपचुनाव त्याकाः हानं पदय् लिहां वयेफु
पदमुक्त जूम्ह लामिछानें थः आः अनागरिक जूगु धासें सर्वोच्चया फैसलायात स्वीकार यायेगु खँ कनादीगु दु । तर थुलि जुइवं वय्कःया राजनीतिक भविष्य हे खत्तम धाःसा मजुइगु खँ धाःगु दु । वय्कलं आः सीडीओ ज्याकुथिइ वनाः हानं शुरुंनिसें हे निवेदन तयाः नेपाली नागरिकता कयादीफु ।
नागरिकता कायेवं वय्कः पार्टीया अध्यक्ष जुइ खनी । खारेज जूगु सांसद पद लित कायेगु लागिं धाःसा वय्कलं हानं चुनाव त्याके माली । वय्कः पदमुक्त जुइवं खाली जूगु चितवन–२ य् निर्वाचन आयोगं उपचुनाव याये माली । उगु उपचुनावय् वय्कलं उम्मेदवारी बी खनी । यदि उकी त्यात धाःसा वय्कः हानं सांसद जुयाः आःयागु हे पदय् लिहां वये फइगु खँ विज्ञतय्सं धाःगु दु ।
LEAVE YOUR COMMENTS