जयनेपाल हलया कम्पाउन्ड क्वय् टुकुचा लुत, महानगरं टुकुचा व्यवस्थित यायेफइ ला ?

येँ (नेपालभाषा टाइम्स)- जय नेपाल हलया कम्पाउन्ड दुनं टुकुचा खुसि बाः वनाच्वंगु लूगु दु । येँ महानगरपालिकां टुकुचाया बहाव क्षेत्र पत्ता लगे यानाः म्हुया स्वःबलय् हलया कम्पान्डं क्वं टुकुचा बाः वनाच्वंगु लूगु खः ।

येँ महानगरपालिकां वंगु साउन १२ गते टुकुचा खुसि च्वय् व खुसिया जःखः दयेकातःगु अनधिकृत संरचना चीकेत ३५ न्हुया सुचं पिकाःगु खः । थ्व सुचं कथं ३५ न्हु पूवंगुया कन्हय् कुन्हु हे महानगरं जयनेपाल हलया कम्पाउण्डय् म्हुया स्वःगु खः । थथे म्हुया स्वःबलय् कम्पाण्ड तःलं खुसि न्ह्याः वनाच्वंगु लुइकूगु खः ।

महानगरं टुकुचा मालेगु सुरु याःगु न्हापांगु न्हि कुन्हु हे सफलता चूलाकूसां पूवंक टुकुचा मालेत ताःलाइ धयागु खँय् धाःसा शंका ब्वलनाच्वंगु दु । विशेषतः टुकुचा खुसि गनं बाः वनाच्वन धयागु नक्सा हे मदुगुलिं थ्व शंका ब्वलनाच्वंगु खः ।

महानगरपालिकां टुकुचा खुसि मालेगु निंतिं नापी विभाग खुसिया नक्सा बीत इनाप याःबलय् विभागं टुकुचा खुसिया नक्सा हे मदुगु लिसः बियाहःगु खः । टुकुचा खुसिया मुहान नं येँ बाः वइगु मेमेगु खुसिया थें शिवपुरी गुँ हे खः । शिवपुरीं बाः वःगु टुकुचा नारायणहिति दरबार थ्यनेवं गनं बाः वनाच्वंगु हे खनेदइमखु । नारायणहिति दरबारं खनेमदुगु टुकुचा खुसि कमलादीया काठमाडौं प्लाजा थ्यंकाः जक खनेदइ । नारायणहिति निसें कमलादी तकया टुकुचा खुसिया च्वय् आःतकया दुने ततःधंगु संरचना दयेका तयेधुंकूगु दु । अथेहे बागमतिइ ल्वाकज्याः वने न्ह्यःया थ्व खुसिया जवंखवं नं यक्व हे संचरना दयेकातयेधुंकूगु दु ।

छगू ला नापी नक्सा हे मदुगु, उकिसनं खुसि हे त्वपुयाः ततःधंगु संरचना दयेकातयेधुंकूगुलिं टुकुचा खुसि मालेगु ज्याय् महानगर सफल जुइ ला धयागु शंका ब्वलंका बिउगु खः ।

तर येँ महानगरपालिया मेयर बालेन्द्र साह न्ह्याथे यानाःसां टुकुचा खुसिया जःखः व्यवस्थित यायेगु लँय् न्ह्याः वनेधुंकूगु संकेत जयनेपालया कम्पाण्ड म्हुइगु ज्यां क्यनेधुंकूगु दु । तर थ्व ज्या पूवंकेत वय्कःया निंतिं दकलय् तःधंगु पंगः हे खुसिया नक्सा जुयाच्वंगु दु ।

महानगरपालिकाया प्रवक्ता व १७ वडाया अध्यक्ष नवीन मानन्धरं नापी विभाग, भूमि सुधार लिसे समन्वयय यानाः थःपिं न्ह्याः वनेगु खँ धयादीगु दु । महानगरया उद्देश्य धयागु टुकुचा खुसियात खुसि हे दयेका तयेगु खः धासें वय्कलं महानगर थ्व ज्याय् सकसियां लिसे समन्वय यानाः न्ह्याः वनी धयादीगु दु । वय्कलं बिबिसीलिसे खँ ल्हायेगु झ्वलय् टुकुचा खुसि ल्हाना वंगुली नापी विभाग, भूमि सुधार लिसें महानगरपालिका नं दोषी दुगु धासें धयादीगु दु, ‘नापी छाय् खुसि हे खनेमदयेक नक्सा पिकाल, भूमि सुधारं छाय् खुसियात हे भूमि क्यन, अले महानगरं खुसि धकाः सिइक सिइकं छाय् नक्सा पास यात ?’

थ्व स्वंगुलिं निकायया दोष मदयेक छेँ थुवाःया जक गल्ती जूसा छेँ थुनेफइगु, तर छेँ थुवालं स्वीकृति कयाः हे छेँ दनातःगु खःसां छेँ हे थुनाः टुकुचा चायेकेमाल धाःसा क्षतिपूर्ति बिइमालेफुगु खँ नं वय्कलं धयादीगु दु ।

तर नारायणहिति दरबार दुनें निसें हे खुसि खनेमदयेधुंकूगुलिं थ्व खुसियात हाकनं पिकायेफइगु खँ धाःसा यक्वस्यां शंका हे यानाच्वंगु दु । दरबार दुनें मचायेकुसे पिने जक छेँ थुनाः खुसि खनेदयेकेगु सम्भावना तसकं म्हो जक दुगु खँ पिहां वयाच्वंगु दु । क्षतिपूर्ति बीगु खःसां अर्बौं ध्यबा क्षतिपूर्ति बीमालीगुलिं नं थ्व ज्या गुलि तक सम्भव जुइ धयागु न्ह्यसः ब्वलनाच्वंगु खनेदु ।