विप्लव पुचःलिसे स्वापू जक तःसां कारवाही

येँ- प्रतिबन्ध तयातःगु विप्लव नेतृत्वया नेकपाया गतिविधियात आः उच्च निगरानी तयेगु निर्णय सरकारं याःगु दु । वंगु फागुन २८ गते मन्त्रिपरिषदं उगु संगठनयात आपराधिक व विध्वंशकारी संगठन धासें वयागु गतिविधिइ प्रतिबन्ध तयेगु निर्णय याःगु खः । आः वयाः गृह मन्त्रालयं वयागु गतिविधियात नं उच्च निगरानीइ तयेगु नापं हिंसात्मक गतिविधिइ संलग्न न्ह्याम्हेसितं नं कानूनी कारवाही यायेगु निर्णय याःगु खः ।

सरकारं दक्वं सुरक्षा निकाययात उच्च सतर्कता नालेत निर्देशन बीवं नेपाल प्रहरी, सशस्त्र प्रहरी व राष्ट्रिय अनुसन्धान विभागं विप्लव नेतृत्वया पार्टी व वया कार्यकर्तातय् गतिविधियात निगरानी अप्वयेका हःगु खः । थ्व झ्वलय् नेपाल प्रहरीं ७७ गुलिं जिल्लाय् उच्च सुरक्षा सतर्कता नाला काःगु दुसा शान्ति सुरक्षाय् नं सबल व सुदृढ यानागु प्रहरी प्रवक्ता उत्तमराज सुवेदीं कनादिल ।

सरकारं उगु पुचःलिसे सुनानं प्रत्यक्ष वा अप्रत्यक्ष रुपं सम्पर्क तःगु वा उगु पुचःलिसे उकथं हे संलग्न जूपिं व्यक्ति, संघसंस्था व पुचःयात नं कारवाही यायेगु निर्णय याःगु दु । विप्लवया लिपांगु गतिविधि राजनीतिक स्वयां नं आपराधिक जूगु निष्कर्ष पिकासें यदि सुनानं कानूनकथं कायेमाःगु अनुमति मकासे, नवीकरण मयासे, अनुमति कयातःम्ह मनूया मृत्यु लिपा हकवालाया नामय् नामसारी मयासे वा मेगु गुगुं अवैध तरिकां ल्वाभः तयातःगु दुसा सरकारयात बुझे यायेत छगू सुचं नं जारी याःगु दु । वंगु चैत १ गतेनिसें लागू जुइकथं स्वीन्यान्हुया सुचं जारी याःगु खः । विप्लव पुचलं ल्वाभः सुचुका तःगु आशंका यासें थ्व सुचं जारी याःगु खः ।

सम्बन्धित बुखँ

LEAVE YOUR COMMENTS