
चितवन- नेकपा (एमाले)या अध्यक्ष केपी शर्मा ओलीं कार्यकर्तातय्त आः चुनावय् केन्द्रित जुइत निर्देशन बियादीगु दु । पार्टीया झिक्वःगु तःमुँज्याया उलेज्या समारोहय् यासें अध्यक्ष ओलीं निर्वाचनय् बहुमत हयेगु नितिं तयारी यायेत उगु निर्देशन बियादीगु खः ।
सरकारपाखें गलत ढंगं पिहां वयेमाःगु खँ धासें वय्कलं उकियात भिंकेगु नितिं बहुमत हयेमाःगु दावी यानादिल । सम्बोधनया झ्वलय् वयकलं धयादिल, ‘जनमतं एकल बहुमत हयेमाःगु दल, देय् दयेकेत, सार्वभौम सत्ताया रक्षा यायेत, लोकतन्त्र हाकनं तंकेम्वाःलेमा, लोकतन्त्रया रक्षाया नितिं एकल बहुमत हयेमाःगु, संविधानया गलत व्याख्यायात जनादेशं भिंकाः न्ह्याः वनेगु नितिं एमालेयात बहुमत माःगु दु ।’
प्रतिनिधिसभा विघटन यानाः जनताय् वनेगु धयागु खःसां राजनीतिक दलत माने मजूगु द्वपं बिसें धयादिल, ‘गलत लँपुइ मवने, अध्यादेश परमादेशया लँपुइ मवने धकाः जनताया दथुइ वनेत राजनीतिक शक्तित ग्यात, जनताया दथुइ वनेगु प्रक्रियायात पनाबिल ।’
उकथं हे तःमुँज्याय् संवोधन यासें एमालेया प्रधानमन्त्री लिसें नेपाली कांग्रेसया सभापति शेरबहादुर देउवां नीतिगत विमतियात संविधानं क्वःछिउगु विधिं ज्यंकेमाःगु बिचाः तयादिल । फुक्कं राजनीतिक दल संवादया लँपुं न्ह्याःवनेमाः धासें वय्कलं धयादिल, ‘झी दथुइ नीतिगत विषयया विमतियात संविधानं क्वःजिउगु विधिपाखें ज्यंकाः उकियात स्वीकार याना वनेमाः ।’
प्रम देउवां न्हूगु संविधानपाखें लोकतान्त्रिक मूल्य मान्यतायात संस्थागत यायेगु नितिं जिम्मेवार राजनीतिक दलया भूमिका म्हितेत नं एमालेयात इनाप यानादिल । वय्कलं बिस्कं बिस्ंक विचारया मनूत जूगुलिं हे थीथी राजनीतिक दल नीस्वनेमाःगु धासें तर लोकतान्त्रिक मूल्य मान्यता व जीवन्ततायात, व्यक्तिगत स्वतन्त्रताया रक्षा, राष्ट्रिय स्वाधीनता व अखण्डतायात ल्यंकेत फुक्कं राजनीतिक दल छप्पँ जुइमाःगु खँ धयादिल ।
जनता समाजवादी पार्टीया अध्यक्ष उपेन्द्र यादवं महाधिवेशनयात भिन्तुना बीगु झ्वलय् जनआन्दोलन व मधेश विद्रोहया उपलब्धीयात जीवन्त दयेकेगु ई सितिं वनाच्वंगु खँ धयादिल । यादवं धयादिल, ‘नेपाःया जनआन्दोलन व मधेश जनविद्रोहया उपलब्धीयात जालझेल, षडयन्त्र, छलछामया खिउँगु थासं पित हयाः जनताया दथुइ यंकाः जीवन्त दयेकेगु ई सितिं वनाच्वंगु दु ।’ उकथं हे वय्कलं संघीय
लोकतान्त्रिक व्यवस्थायात संस्थागत रुपं सुदृढ यायेत एमालें माक्व ई बीफयेमा धकाः भिन्तुना बियादिल ।
एमालेया तःमुँज्याय् नेकपा माओवादी केन्द्रया स्थायी कमिटी दुजः लिलामणि पौडेल, राष्ट्रिय प्रजातन्त्र पार्टीया अध्यक्ष कमल थापा, राष्ट्रिय जनमोर्चाया अध्यक्ष चित्रबहादुर केसी– पिसं नं सम्बोधन यानादीगु खः ।
एमालेया म्हिगःनिसें न्ह्याःगु तःमुँज्याया थौं बन्द सत्र यायेगु ज्याझ्वः दु । तःमुँज्यां पार्टी अध्यक्ष लिसे फुक्कं पदाधिकारीपिं सर्वसम्मत ढंगं ल्ययेगु तयारी यानाच्वंगु खःसां नं अध्यक्षय् पुलांम्ह उपाध्यक्ष भीम रावलं थःत अध्यक्ष कथं उम्मेदवारी घोषणा याये– धुंकूगु दु । मेमेगु पदय् नं आः तक सुनानं उम्मेदवार जुइगु घोषणा मयासे ओलीया बिचाः पियाच्वंगु दु ।
LEAVE YOUR COMMENTS