ने. सं. ११४४ कौलाथ्व षष्ठी -

जुजुवादी विरुद्ध नं मोर्चा

येँ (नेपालभाषा टाइम्स)- राजतन्त्र पुनस्र्थापना यायेमाः धइगु माग न्ह्यःने तयाः राप्रपा लगायत थीथी पुचःतय्सं फागुन ७ निसें न्ह्याकेत्यंगु आन्दोलन विरुद्ध समाजवादी शक्तितय्गु संगठन समाजवादी मोर्चां नं शक्ति प्रदर्शन याइगु जूगु दु ।

म्हीग बहनी बालुवाटारय् च्वंगु समाजवादी मोर्चाया बैठकय् देशय् संघीयता, गणतन्त्र व धर्मनिरपेक्षता विरुद्ध जुयाच्वंगु थीथी गतिविधियात कयाः चिउताः प्वंकेगु ज्या जूगु खः । अज्याःगु ज्यायात परास्त यायेगु लागिं थ्वहे वइगु सहिद दिवसया सन्दर्भ लाकाः माघपाखे येँय् छगू तःधंगु प्रदर्शन व सभा यायेगु निर्णय नं मोर्चां याःगु दु ।

थ्व ज्याझ्वः समाजवादी मोर्चां याइगु खःसां थुकी सत्तारुढ दल नेपाली कांग्रेसयात समेत दुथ्याका यंकेगु लागिं प्रधानमन्त्री पुष्पकमल दाहालं पहल यानादीगु खँ धाःगु दु ।
जुजुवादी हिन्दू पार्टी राप्रपां थीथी पुचःलिसे जानाः फागुन ७ गतेनिसें आन्दोलन न्ह्याकेगु धकाः निर्णय याना तःगु दु । वि.सं. २००७ सालय् फागुन ७ गते कुन्हु हे भारतय् बिसिउँ वनाच्वंम्ह जुजु त्रिभुवनयात हानं गद्दीइ तःगु न्हियात लुमंकाः राप्रपां वकुन्हु हे थ्व प्रदर्शनया तयारी याःगु खः । ०७ सालया फागुन ७ गते जुजु त्रिभुवनयात गद्दीइ तः थें आः नं फागुन ७ गते हे निवर्तमान जुजु ज्ञानेन्द्र शाहयात गद्दीइ तयेगु धइगु संकेत कथं ७ गतेनिसें आन्दोलन न्ह्याकेगु घोषणा याःगु खः । लुमंकेबहः जू, ०७ सालया फागुन ७ गते त्रिभुवनयात गद्दीइ तःगु इलय् नं नेपाःया गद्दीइ ज्ञानेन्द्र शाह हे जुजु जुयाच्वंगु खः ।

म्हीग जूगु समाजवादी मोर्चाया बैठकय् राप्रपाया नेतृत्वय् न्ह्याइगु थ्व आन्दोलनया लिउने आपालं देशीविदेशी शक्तितय्सं साथ बियाच्वंगु धकाः नं विश्लेषण जूगु खः ।
मोर्चाया बैठकं आः पुस मसान्त तक देय्या ७७ गुलिं हे जिल्लाय् मोर्चाया जिल्ला संगठन गठन याये क्वचायेकेगु धकाः नं निर्णय याःगु दु । थौंकन्हय् ५० गू जिल्लाय् मोर्चाया कचा दयेधुंकूगु दु । अनंलिपा माघ १ गतेनिसें १५ गते देय्न्यंकं थीथी नगर व गामय् छुं कि छुं ज्याझ्वः यायेगु अले सहिद दिवसया जःखः लाकाः तःधंगु सभा यायेगु खँ क्वःछिउगु दु ।