हाकु पर्सि तुयुगाचा म्यूजिक भिडियो पिदन

ख्वप (नेपालभाषा टाइम्स)- ख्वपया संगीतकःमि भिम प्रजापतिया च्वसां पिदंगु, वय्कलं हे लसय् हनाः निशा देसारं लिसे हालादीगु “ हाकु पर्सि तुयुगु गाचा” बोलया म्येया म्युजिक भिडियो विहीबाः ख्वपया हे कमल बिनायक बेंक्वेटय् पितब्वज्या जूगु दु ।

ज्याझ्वलय् नेपालभाषाया न्हापांम्ह म्युजिक भिडियो निर्देेशक विजयरत्न असंबरे मूपाहां कथं झायादीगु खः । म्ये पितब्वज्या ज्याझ्वलय् मूपाहां असंबरें नेवाः म्युजिक भिडियोया स्वकुमि धयापिं विशेष यानाः नेवाःत हे जूगुलिं नेवाःतय्गु हे युट्युब च्यानलय् अपलोड यायेमाः धयादिल ।

ज्याझ्वलय् कलाकार मणिराज लवट, हिसिला महर्जन, संकिपामि आर्यम नकःमि, राजेशमान सिंह , छायाकार सोहन मानन्धर, संगीतकःमि भिम प्रजापति विशेष पाहां कथं झायादीगु खः ।

आराध्य लक्ष्मी खडगीया निर्देशन व कोरियोग्राफिइ दुगु थ्व म्येय् वयक स्वयं नाप रवि सैंजु मू भुमिका म्हितातःगु दु । थ्व म्येया छायाँकन व सम्पादन सोहन मानन्धरं यानादीगु खः । जुगल डंगोलं बाजं ग्वसाः ग्वयादीगु थ्व म्येया म्यूजिक भिडियोया निंतिं सनमकुमार श्रेष्ठ, सनम प्रजापतिं व रुपा मानन्धर जाना समाः ज्या यानादीगु खः ।

सञ्चारकःमि सुरजवीर बज्राचार्यं न्ह्याकादीगु उगु म्येया पितब्वज्या ज्याझ्वः झिंन्याम्हेसिया निर्माण पुचःपाखें पुष्कर दुलालया सभापतित्वय् जूगु खः । ज्याझ्वलय् आराध्यलक्ष्मी खड्गी, जुगल डंगोल , राजेशमान सिंह, भिम प्रजापति, निशा देसार, हिसिला महर्जन लगायतं नुगःखँ तयादीगु खः ।