ने. सं. ११४४ कौलाथ्व तृतीया -

भिंद्यः गुथिया ११५ क्वःगु बुसादँ

येँ(नेपालभाषा टाइम्स)- भिंद्यः गुथि कालिमातिया ११५ क्वःगु पलिस्था दिं (बुन्हि) व निक्वःगु तःमुँज्या जुल । वंगु शनिवाः कालिमातिइ च्वंगु लुमन्ति छेँय् गुथिया पलिस्था दिं व तःमुँज्या जूगु खः ।

गुथिया थकालि शंकर मानन्धरया सभापतित्वय् जूगु ज्याझ्वःया उलेज्या मूपाहांकथं झायादीम्ह केन्द्रीय मानन्धर संघया सभापति मनोजकुमार मानन्धरं त्वाःदेवाय् मत च्याकाः यानादीगु खः ।

गुथिया न्वकु धर्मकृष्ण मानन्धरं लसकुस यानादीगु ज्याझ्वलय् छ्याञ्जे प्रकाशबहादुर मानन्धरं वार्षिक प्रगति विवरण व दांभारिं लक्ष्मीदास मानन्धरं आर्थिक प्रतिवेदन न्ह्यब्वयादीगु खः ।

ज्याझ्वलय् गुथिया ७४ दँ पुलेधुंकूपिं ज्याथपिं व ६९ दँ पुलेधुंकूपिं जिथिपिंत हनेज्या नं याःगु खः । उगु इलय् ७४ दँ पुलेधुंकूपिं गुथिया न्याम्ह दुजःपिं रामकृण मानन्धर, बद्रीमान मानन्धर, लक्ष्मीदास मानन्धर, माधवलाल मानन्धर व तीर्थमान मानन्धर अथे हे ६९ दँ पुलेधुंकूपिं जिथिपिं पूर्णलक्ष्मी मानन्धर, गुणकेशरी मानन्धर, सुर्जमाया मानन्धर व राधा मानन्धरयात दोसल्ला न्ययेकाः हनापौ देछासे हनेज्या याःगु खः ।

थुकथं हे गुथियात निरन्तर रुपं धाः बाजं स्यनेगुलिइ ग्वाहालि याना वयाच्वंगु लाय्कूसाः मानन्धर समाजयात हनापौ नापं बाजं स्यानादीपिं गुरुपिं किरणकुमार मानन्धर व निराकार मानन्धरयात लुमन्ति चिं नं लःल्हाःगु खः ।

उगु हे ज्याझ्वलय् धर्मकृष्ण मानन्धर व तेजलक्ष्मी मानन्धरं थःपिनिगु नापं नीस्वनादीगु प्रतिभा सिरपाः नं लःल्हाःगु खः । गुथिपाखें वंगु होलिपुन्हिकुन्हु ग्वसाः ग्वःगु भिंद्यः गुथि होलि गुँभ्वजय् थःथःगु प्रतिभा न्ह्यब्वयादीपिं झिंच्याम्हेसित उगु सिरपाःकथं दसिपौ, मेडल व दां सिरपाः लःल्हाःगु खः ।

लिसें एसइइ परीक्षाय् ताःलाःपिंत लःल्हाना वयाच्वंगु ‘रामप्रसाद मानन्धर – सानुमैयाँ मानन्धर लुमन्ति सिरपाः’ नं लःल्हाःगु खः । कोरोनाया कारणं वंगु स्वदँ न्ह्यःनिसें दिनाच्वंगु सिरपाः थुगुसी छक्वलं च्याम्हेसित दाता जगदिश मानन्धर, रमिला मानन्धर व मूपाहांपाखें हनापौलिसें वहया पदक लःल्हनादीगु खः ।

ज्याझ्वःया निगूगु ब्वय् गुथिया न्हूगु ज्यासना पुचःया नं ल्यज्या याःगु खः । तीर्थमान मानन्धरया अध्यक्षताय् गुम्हेसिया ज्यासना पुचलय् धर्मकृष्ण मानन्धर न्वकु,

प्रकाशबहादुर मानन्धर छ्याञ्जे, रमेश मानन्धर दांभरिं व विद्यानायक मानन्धर (गुथि पाःलाः)यात पदेन लिउछ्याञ्जेकथं ल्यःगु खः । थुकथं दुजलय् मंगलनारायण मानन्धर, भाजु हरिकृष्ण मानन्धर, भाजु जगदिश मानन्धर व भाजु पूर्णप्रसाद मानन्धरयात ल्यःगु दु ।

ज्यासना पुचः ल्ययेत केन्द्रीय मानन्धर संघया छ्याञ्जे गजेन्द्रमान मानन्धर, दुजःपिं राजु मानन्धर व कृष्णबहादुर मानन्धर दुथ्याःगु निर्वाचन कमिटी गठन याःगु खः ।
ज्याझ्वलय् मूपाहां मनोजकुमार, निर्वाचित नायः तीर्थमान, बाजं गुरु किरणकुमारलिसें थीथी व्यक्तित्वपिंसं नुगःखँ तयादीगु खःसा सांस्कृतिक ज्याझ्वः नं न्ह्यब्वःगु खः ।