ख्वप नपापाखें सापारुया सिरपाः घोषणा

ख्वप(नेपालभाषा टाइम्स)÷ ख्वप नगरपालिकां थुगुसी सापारुया झ्वलय् पिहां वःगु थीथी सांस्कृतिक झाँकी व ख्यालःया लिच्वः पिथंगु दु । नगरपालिकां वंगु साउन २९ निसें भदौ २ गतेतक ख्वपया दत्तात्रय व नासमना त्वलय् च्वनाः पम्परागत सांस्कृतिक व आधुनिक विधाय् याःगु मूल्यांकनया लिधंसाय् सापारुया सिरपाः घोषणा याःगु खः ।

नगरपालिकां सार्वजनिक याःगु लिच्वःकथं भैलः प्याखंपाखें विश्वकर्मा भैलःप्याखं (थःने) न्हाप लाःगु दुुुसा जेठा गणेश भैलः (तालाक्व) लिउ व तुंथिमला भैलः प्याखं (तुंथिमला) लियांलिउ लाःगु दु । थुकथं हे देवी प्याखंपाखें गलसी पुखू देवी प्याखं, खःलाँ देवी प्याखं व मुक्ति संगीत प्रशिक्षण केन्द्र छसिकथं न्हाप, लिउ व लियांलिउ लाःगु दुसा खर्बुजा देवी प्याखनं हःपाः सिरपाः त्याकेत ताःलाःगु दु । अथे हे माकः प्याखनय् कोटदेवी दाफा खलः झौख्यः न्हाप, याता भजन लिउ व यापी भैरव लियांलिउ लाःगु दु ।

मेखे आधुनिक विधापाखे ख्वप माध्यमिक विद्यालय व ख्वप कलेजया मंकाः न्ह्यब्वया ख्यालः ‘भविष्य’ न्हाप लाःगु दुसा निर्देशकद्वय राजेन्द्र श्रेष्ठ व श्यामसुन्दर शिल्पकार उत्कृष्ट निर्देशक जुयादीगु दु । उगु हे ख्यालःया पलिस्था रंजितकारं उत्कृष्ट मिसा कलाकारया सिरपाः त्याकादीगु दु
थुकथं हे नाट्यमकर्मि समाजं न्ह्यब्वःगु ख्यालः लिउ लाःगु दुसा रत्नकावी नाय्भारीयात उत्कृष्ट गाइचा म्येँ हालामि, खँला देवी प्याखनय् पछिमा थानादीम्ह रामप्रसाद किजूयात उत्कृष्ट मिजं कलाकार घोषण याःगु दु ।

अथे हे लुसि प्याखं, फाकंदली प्याखं, लाखे प्याखं, गाईचा, घिन्तांघिसि नापं नीन्यागू विधाय् मूल्यांकन यानाः न्हाप, लिउ व लियांलिउया घोषणा याःगु दु ।