येँयाःयात विश्वब्यापी यायेगु अभियानय् दु – मेयर शाह

 

येँ (नेपालभाषा टाइम्स)÷ येँ महानगरपालिकां येँयाः नखःयात विश्वब्यापी यायेगु अभियान न्ह्याकागु खँ धाःगु दु । थ्व हे अभियान अन्तर्गत येँया नखः अवलोकनया निंतिं विश्वया थीथी देय्या नीन्यागू नगरया प्रमुखपिंत येँयाः नखः स्वःवयेत ब्वनापौ छ्वयागु खँ धाःगु दु ।

येँ महानगरपालिकाया मेयर बालेन शाहं बुधवाः जूगु पत्रकार सम्मेलनया झ्वलय् थ्व जानकारी बिउगु खः । येँ महानगरपालिकाय् जनप्रतिनिधितय्सं पदभार ग्रहण याःगु सछिन्हु क्यंगु झ्वलय् हनुमानध्वाखाया ल्वहँचुकय् याःगु पत्रकार सम्मेलनय् मेयर साहं थ्व खँ धाःगु दु ।

पत्रकार सम्मेलनय् न्ववासें वय्कलं धयादीगु दु, ‘परम्परागत रुपं न्यायेका वयाच्वंगु येँयाः पर्व विश्वब्यापी यायेगु तातुनाः थीथी देय्या नगरप्रमुखपिंत निमन्त्रणा यानागु दु । न्हापा नं थीथी देय्या नगरया प्रतिनिधिपिं वयाः जात्रा अवलोकन यायेगु ज्या जूगु खः । आः नं थुकियात निरन्तरता बियागु दु । वय्कःपिंत जात्रा जक क्यनेगु मखु, स्वनिगःया थीथी थाय्या भ्रमण नं याकेगु जुइ । वय्कःपिं थःगु देय् लिहां वनेधुंकाः थनया भचासां प्रचार यानाबी धयागु आशा यानागु दु ।’

स्वनिगःया नखःचखः, जात्रा पर्व धर्म लिसे जक मखु मनोरञ्जन, लसता, उमङया पक्ष नं उलि हे स्वानाच्वंगु दु धासें वय्कलं धयादीगु दु, ‘स्वनिगःया मूर्त अमूर्त सम्पदाया बांलाःगु पक्ष छु धाःसा थुपिं पूजाआजानाप जक स्वापू दुगु मखुकि थुकी मनोरञ्जन पक्ष, लसता क्षण, उमंगया पक्ष नं क्वातुक स्वाना वयाच्वंगु दु । उकिं थुकियात विश्वब्यापीकरण यानाः यंकेमाः । थथे यायेफत धाःसा झीगु पर्यटन क्षेत्र नं उलि हे बांलाइ ।’

ज्याझ्वलय् न्ववासें उपप्रमुख सुनिता डंगोलं यँेयाः जात्रा येँय् देय्या जक जात्रा मखसे मुक्कं देय्या हे जात्रा खः धयादिल । वय्कलं यःसिं थनाः यँयाः न्ह्याःगु न्हि कुन्हु हे थःपिंसं पदभार कयागु सछिन्हु पूवंगु खँ थःगु निंतिं तसकं सुखद् जूगु धयादिसें मिसापिसं रथ सालेगु नानिचा याः कुन्हु थम्हं नेतृत्व यायेगु खँ नं धयादीगु दु ।

थ्वहे झ्वलय् उपप्रमुख डंगोलं थःपिसं पदभार ग्रहण यानागु सछिन्हु दुने जूगु ज्या व न्ह्याकागु योजनाया श्वेतपत्र जारी यानादीगु खः । डंगोलं जारी याःगु श्वेतपत्रय् सछिन्हुया दुने यानागु झिंन्यागू ज्या व झिगू योजना बारे न्ह्यथनातःगु दु ।

पत्रकार सम्मेलनय् येँ मनपाया प्रवक्ता व १७ वडाया अध्यक्ष नविन मानन्धरं महानगरलिसे भगिनी स्वापू दुगु झिंच्यागू नगर व दक्षिण एसियाली देय्या न्हय्गू राजधानीया नगरप्रमुखपिंत ब्वनापौ छ्वयागु जानकारी बियादीगु खः ।

 

सम्बन्धित बुखँ

LEAVE YOUR COMMENTS