ने. सं. ११४४ ञलाथ्व नवमी -

सरकारं मांभाय्या संरक्षणय् ध्यान मबिउ

येँ – नेपाःया जनगणना २०६८ या प्रतिवेदनकथं नेपालय् नवाइगु मौलिक मांभाय्या ल्याः १२३ दु । नेपाः संविधानय् नं थ्व खँ उल्लेख जुयाच्वंगु दु । उकिं नेपाः छगू बहुजाति, बहुभाषिक देय् खः धकाः धायेगु यानच्वंगु दु । तर, थुपिं भाय् व भाय् ल्हाइपिनिगु भेषभूषाया उचित संरक्षण धाःसा जुइ फयाच्वगु मदु । नेपालय् आपालं भाषा व भेषभूषा दुसां उकिया यथोचित रुपं संरक्षण मजूगु धासें चिउताः प्वंकूगु दु । नेपाल प्रज्ञा प्रतिष्ठान, भाषा आयोग व युनेस्को येँया ग्वसालय् विश्व मातृभाषा दिवसया लसताय् लाकाः ग्वसाः ग्वःगु छगू ज्याझ्वलय् सरोकारवालातय्सं उकथंया चिउताः प्वंकूगु खः । ‘मातृभाषा विचार गोष्ठि–२०७४’ य् नवाःपिं वक्तातय्सं प्रविधिया प्रयोग व्यापक रुपं अप्वया वंगु व बसाइँसराइया कारणं मांभासं नवाइपिनिगु ल्याः म्हो जुया वंगु धासें चिउताः प्वंकूगु खः ।

प्रतिष्ठानया कुलपति गंगाप्रसाद उप्रेतीं नेपालय् आपालं मातृभाषा दुसां नं बुलुहुँ लोप जुया वनाच्वंगु धासें उकिया संरक्षणया निंतिं विद्यालयस्तरंनिसें हे मांभासं शिक्षा बीमाःगु आवश्यक जूगु खँय् बः बियादिल । वय्कलं धयादीगु दु, ‘नेपालय् नवाइगु आपालं मातृभाषा मरणासन्न अवस्थाय् थ्यने धुंकूगु दु, उकिया ल्यंकेगु निंतिं विद्यालयस्तरं हे मांभासं शिक्षा बीमाःगु अतिकं आवश्यक जू ।’ज्याझ्वलय् भाषा आयोगया अध्यक्ष डा. लवदेव अवस्थीं मातृभाषा स्थापित जुल धाःसा राष्ट्रिय भाषा व अंग्रेजी भाय्या अस्तित्व मदया वनी धइगु भ्रम व ग्याःचिक ब्वलनाच्वंगु दु । उकिं सरकारं मातृभाषाया संरक्षण यायेगु खँय् बेवास्ता यानाच्वंगु द्वपं बियादिल । भाषाप्रति न्यना वनाच्वंगु भ्रमयात हुया छ्वयेमाःगु हे आःया मुख्य चुनौति जूगु वय्कलं धयादीगु दु ।

नेपाःया निंतिं बंगलादेशया राजदूत मास्फी विन्ते साम्सं मांभाय्या विकास व विस्तारया निंतिं बंगलादेश महत्वपूर्ण भूमिका म्हिता वयाच्वंगु धयादिसें भाषा आन्दोलनया झ्वलय् ढाका विश्वविद्यालयय् आपालं मनूतय्सं थःगु ज्यान तकं मदयेका च्वनेमाःगु जानकारी बियादिल ।
ज्याझ्वलय् प्रतिष्ठानया उपकुलपति डा. विष्णुविभु घिमिरें नेपाःया मातृभाषाया विकासया निंतिं प्रतिष्ठानं न्ह्याबलें ज्या यानाच्वंगु दु धयादिल । प्रतिष्ठानया सदस्य सचिव जीवेन्द्रदेग गिरीं प्रतिष्ठानं, मैथिली, भोजपुरी, नेपालभाषा, लिम्बु, गुरुङ लगायतया मांभासं खँग्वःधुकू व ब्याकरण सपूm पिथना वयाच्वंगु जानकारी बियादिल ।