थप २७९म्हेसित कोरोना, संक्रमित ४३६४म्ह थ्यन

येँ – नेपालय् थप २ सय ७९म्हेसित कोरोनाया संक्रमण जूगु दु । स्वास्थ्य तथा जनस्वास्थ्य मन्त्रालयया प्रवक्ता डा. जागेश्वर गौतमया कथं थप २ सय ५७म्ह मिजं व २२म्ह मिसात संक्रमण जूगु दु । नेपालय् संक्रमिततय् ल्याः ४ हजार ३ सय ६४म्ह थ्यंगु दु ।

येँया राष्ट्रिय जनस्वास्थ्य प्रयोगशालाय् याःगु परीक्षणय् धनुषाया ११म्ह, गोरखाया ४म्ह, कपिलवस्तुया २२म्ह, नुवाकोटया १म्ह, सर्लाहीया १५म्ह, सिन्धुपाल्चोकया २म्ह, सिरहाया १म्ह व उपयपुरया ३म्ह यानाः ९७म्ह संक्रमित जूगु दु । अथेहे देय्या थीथी जिल्लाया प्रयोगशालाय् याःगु परीक्षणय् १ सय ८२म्ह मनूत संक्रमित जूगु खः ।

अथेहे वंगु नीप्यघौया दुने थप ९०म्ह मनूत अस्पतालं डिस्चार्ज जूगु दु । ८८म्ह मिजं व २म्ह मिसात कोरोनामुक्त जुया अस्पतालं डिस्चार्ज जूगु खः । थ्व नापं नेपालय् डिस्चार्ज जूपिनि ल्याः ६ सय ७४म्ह थ्यंगु दु ।