लिङ्देनपाखें सांसद ‘परित्याग’ !

येँ (नेपालभाषा टाइम्स)÷ निर्वाचित जनप्रतिनिधितय् न्हापांगु संसद बैठक मच्वंतले न्हापाया संसदया कार्यकाल हे कायम यानातयेगु कथं सरकारं विधेयक हयेगु तयारी यायेवं राष्ट्रिय प्रजातन्त्र पाटीया अध्यक्ष राजेन्द्र लिङेदनंं थःगु संसद पद ‘परित्याग’ यायेगु घोषणा यानादीगु दु । संसदय् हे संवोधन यायेगु झ्वलय् थज्याःगु अनैतिक ज्याय् सहभागी जुइत थःगु आत्मां माने मजू धासें वय्कलं थःगु थ्व संवोधन हे संसदय् अन्तिम संवोधन जुल धासें सांसद पद ‘परित्याग’ यायेगु खँ धयादीगु खः । थ्व झ्वलय् वय्कलं थःगु तलब भत्ता नं छ्वया महयेत सभामुखयात इनाप यानादीगु दु ।

सरकारं हयेत्यंगु थ्व विधेयकयात कयाः तःधंगु विवाद ब्वलनाच्वंगु दु । थ्व विधेयक हयेगु निंतिं सरकारं सामान्यत विधेयक पपिरपक्व यायेत न्यान्हुया ई बिइगु व्यवस्थायात नं निलम्बन यानाः छन्हुइ हे सीमित यानाबिउगु खः ।

संविधानय् संसदया कार्यकाल सुरु जुइगु व अन्त्य जुइगु मिति तोके मयासे ‘ई स्वयां न्ह्यव हे विघटन मजूसा संसदया कार्यकाल न्यादँ तक दइ’ धकाः जक उल्लेख यानातःगु व्यवस्थायात ज्वनाः न्हूगु विधेयक हयेगु तयारी याःगु खः । थ्व विधेयक कथं आः जुइत्यंगु संसदीय चुनाव क्वचाया निर्वाचित जुयावःपिं जनप्रतिनिधितय्गु न्हापांगु संसदीय बैठक मच्वंतले आः दुपिं हे सांसद कायम जुयाच्वनी ।
थ्व व्यवस्था सांसदतय् कार्यकाल ताःहाकयेत स्वःगु धासें विवाद जुयाच्वंगु दु ।

थ्व हे विवादया झ्वलय् सांसद लिङदेनं निर्वाचन घोषणा यायेधुंकाः संसद जीवित यानातये उपयुक्त मजूगु थःपिनिगु धारणा दुगु खँ धासें संसदं संवोधनया झ्वलय् धाःगु दु ‘संसदया आयु मंसिर ४ गते धुंकाः नं कायम यानातयेगु कथं निर्णय व प्रक्रिया शुरु जूगुलिं जितः थुकिं तसकं लज्जित व दुःखित यानाबिउगु दु ।’

‘प्रजातन्त्रय् विश्वास याइगु राजनीतिक दलतय्सं निर्वाचनयात निष्पक्ष, स्वतन्त्र व धाँधली रहित दयेकेत सरकार तकं चुनावी सरकारय् हिलेमाः धयागु जिमिगु धारणा खः, तर थन संसद तकं ताःहाकयेगु ज्या जुयाच्वंगु दु । थज्याःगु प्रक्रियाया निंतिं सांसदय् रुपय् उपस्थिति जुइफइमखु’ लिङदेनं धाःगु दु ।वय्कलं सांसदयात दइगु फुक्क कथंया सुविधा त्याग यायेगु धासें थःगु तलब, भत्ता व मेमेगु सुविधा छ्वया महयेत नं सभामुखयात इनाप याःगु खः ।

सम्बन्धित बुखँ

LEAVE YOUR COMMENTS