नेकपां थौं ‘बागमति’ दर्ता याइगु

येँ -प्रदेशया स्थायी राजधानी व नामाकरणयात कयाः तनावग्रस्त जुयाच्वंगु ३ नं. प्रदेशया संसदीय बैठक थौं च्वनीगु जूगु दु । लिसें थौं हे सत्तारुढ दलपाखें प्रदेशया नां बागमति व स्थायी राजधानी हेटौंडा जुइमाः धइगु प्रस्ताव नं दर्ता याइगु खँ धाःगु दु । संसद गय् यानाः सञ्चालन यायेगु धइगु बारे थौं हे कार्यव्यवस्था समितिया बैठक च्वनाः कार्यविधि दयेकीगु खँ सभामुख सानु श्रेष्ठं कनादीगु दु । संसदय् प्रदेशया नांयात कयाः थीथी प्रस्ताव दर्ता जुयाच्वंगु कारणं उकी मतदान गय् यानाः यायेगु धकाः कार्यविधि दयेकीगु खः ।

मेखे बागमति प्रदेश बारे नेपाल कम्युनिष्ट पार्टीया सचिवालयं छ्वया हःगु निर्देशनया सवालय् प्रदेश सांसदतय् दथुइ विभाजन वःगु खँ सीदुगु दु । नेकपाया ६२ सांसदपिंसं बागमति प्रदेशया विरोधय् थःपिनिगु धापू तयेगु ज्या जुइधुंकूगु खँ सूत्रं धाःगु दु । तर छुं छुं सांसदपिंसं धाःसा पार्टीया निर्देशन माने यायेमाः धकाः बागमति प्रदेशयात समर्थन याःगु खँ सीदुगु दु । थौंया बैठकय् दकलय् न्हापां प्रदेशया राजधानी व नामाकरण यायेगु निंतिं गठन जूगु समितिं बिउगु सुझाव दर्ता जुइगु खँ प्रदेशया सांसद विशाल खड्का ‘नेपालभाषा टाइम्स’ यात कनादीगु दु ।

वय्कलं थौंया बैठकय् बागमति प्रदेशया नां नं दर्ता जुइ फइगु सम्भावना दु धासें तर थःपिंसं उकिया विरोधय् वनेगु खँ कनादीगु दु ।
वय्कलं धयादी, ‘फयांफछि बागमति प्रदेशया नां दर्ता मयाकेगु कुतः जुइ, यदि दर्ता हे जुल धाःसां नं उकियात असफल यायेगु जुइ ।’ तर बागमति प्रदेश दर्ता याये न्ह्यः समितिं बिउगु सुझावयात कयाः वहस व सहलह यायेगु खँ नं वय्कलं धयादीगु दु ।

थ्वहे झ्वलय् पार्टीया निर्णय लागू याकेगु निंतिं प्रदेश ३ या सांसदपिंत थुइकेत नेकपाया अध्यक्ष पुष्पकमल दाहाल व पार्टीया महासचिव बिष्णु पौडेल कन्हय् हेटौंडा थ्यंकः वइगु खँ सूत्रं धाःगु दु । कन्हय् च्वनीगु प्रदेशया संसदीय दलया बैठकय् अध्यक्ष दाहाल व महासचिव पौडेलं सम्बोधन यानादीगु खँ नं धाःगु दु । वय्कःपिं थौं हे हेटौंडा थ्यंकेगु योजना दुगु खःसां येँय् संघीय संसदया सभामुख बारे सहलह यायेमाःगुलिं वय्कःपिं कन्हय् जक हेटौंडा वने त्यंगु खः ।

कांग्रेसया बिचाः ः
नेपाली कांग्रेसया प्रदेश सांसद नरोत्तम बैद्यं नं बागमति नांयात अस्वीकार यासें ‘नेवाः ताम्सालिङ’ जुइमाः धयादीगु दु । नेपालभाषा टाइम्स’ लिसे खँ ल्हासें वय्कलं प्रदेशया नां नेवाः ताम्सालिङ मखुसा ‘नेपालमण्डल’ वा ‘पशुपतिनाथ’ जुइ माःगु खँ नं धयादीगु दु । उकथं हे प्रदेशया राजधानी हेटौंडा पाय्छि मजू धासें काभ्रेय् राजधानी तयेमाःगु खँ नं धयादीगु दु । वय्कःया कथं कांग्रेसया आपालं सांसदपिं प्रदेशया नां बागमति तयेमाः धकाः धयाच्वंपिं दुसां नं राजधानी धाःसा काभ्रेय् तयेमाः धाइपिं यक्व दु ।

सम्बन्धित बुखँ

LEAVE YOUR COMMENTS