बालं तयेगु बारे महानगरया न्हूगु कानुन
येँ (नेपालभाषा टाइम्स)÷येँ महानगरपालिकां ‘बहाल व्यवस्था कार्यविधि’ दयेकेगु ज्या न्ह्याकूगु दु । छेँ बालं बीगु सम्बन्धी व्यवस्थायात कडाइ यायेगु आज्जु तयाः महानगरं
छेँथुवाः व बालं च्वनीपिनि दथुइ अनिवार्य सम्झौता यायेमाःगु कथंया कार्यविधि दयेकेत्यंगु खः ।
महानगरया राजस्व परामर्श समितिं बहाल व्यवस्था कार्यविधि मस्यौदा विधायन समितिइ छ्वयेगु निर्णय यायेधुंकूगु दु । वंगु बुधवाः च्वंगु परामर्श समितिया बैठकं उगु व्यवस्थायात कयाः दफावार सहलह यानाः विधायन समितिइ छ्वयेगु निर्णय याःगु खँ समितिया संयोजक लिसें महानगरपालिकाया उपमेयर सुनिता डंगोलं कनादीगु दु ।
बैठकय् महानगरया निर्देशक लिसें विधायन समितिया सदस्य सचिव बसन्त आचार्यं कार्यविधि न्ह्यब्वयादीगु खः । आचार्यया कथं आः आर्थिक ऐनया बः कयाः छेँबाः म्हयेगु ज्या जुयाच्वंगु दु । बालं बीगु व्यवस्था सम्बन्धी महानगरया कानुन मदुगुलिं आर्थिक ऐनं क्वःछिउगु आम्दानीया १० प्रतिशत महानगरं कायेगु बाहेक मेगु समस्या ज्यंकेगु नितिं ज्या यायेमफयाच्वंगु खः ।
आचार्यं बैठक लिपा धयादिल, ‘थ्व ऐन वयेधुंकाः छेँथुवाः व बालं च्वनीपिं निगुलिं पक्षयात फाइदा जुइ, महानगरयात नियमन यायेत अःपुइ । आःतक बाः सम्बन्धी ज्या महानगरं आर्थिक ऐनयात बः कयाः यानाच्वंगु दु । आः बिस्कं ऐन दयेकेधुंकाः अझ अःपुइ । आः दयेकाच्वनागु कार्यविधिया मस्यौदा फुक्कं न्हूगु खः ।’
LEAVE YOUR COMMENTS