जैशिदेवल क्लब २९ दँय् क्यन
येँ(नेपालभाषा टाइम्स)- येँ महानगरपालिका २१ वडा न्हूघलय् च्वंगु जैशिदेवल युथ क्लब २९ दँय् क्यंगु दु । क्लबं थःगु २९ गुक्वःगु वार्षिकोत्सव थीथी ज्याझ्वः यासें हंगु दु ।
क्लबया वार्षिकोत्सवया लसताय् वहृत सरसफाइनिसें तेक्वान्दो कासा तकया ज्याझ्वः याःगु खः । क्लबया कार्यकारिणी सदस्य प्रमेशबहादुर श्रेष्ठया संयोजकत्वय् जैशिदेगः परिसरय् बृहत सरसफाइलिसें १२५ गू पसःयात निःशुल्क रुपं फोहर संकलन यायेगु बाल्टिन नं वितरण याःगु खः ।
कोषाध्यक्ष गिरीधर श्रेष्ठया संयोजकत्वय् निःशुल्क स्वास्थ्य शिविर संचालन याःगु खः । स्टार हस्पीटलया सहकार्यय् जूगु शिविरय् २१५ म्हेसिया हाडजोर्नी, नशा, नुगःचुया स्वास्थ्य परीक्षणलिसें निःशुल्क वासः वितरण याःगु खः ।
थुकथं हे कार्यकारिणी सदस्य राजेन्द्र महर्जनया संयोजकत्वय् स्वक्वःगु स्वनिगःव्यापी विद्यालयस्तरीय किपा च्वज्या कासा जूगु खः । ‘विश्वयात नेपाःया म्हसीका’ शीर्षक बियाः ६ निसें १२, १३ निसें १६दँया निगू पुचलय् जूगु किपा च्वज्या कासाय् थीथी ब्वनेकुथिया १५६ म्ह मस्तय्सं ब्वति काःगु खः ।
अथे हे क्लबया अध्यक्ष राजेश प्रजापतिया संयोजकत्वय् जूगु इन्त्रा डोजाङ तेक्वान्दो कासाय् क्लबया हे डोजाङय् प्रशिक्षण कयाच्वंपिं १५० म्ह प्रशिक्षार्थीतय् सहभागिता दुगु खः ।
क्लबया अध्यक्ष प्रजापतिया सभापतित्वय् जूगु सिरपाः लःल्हायेगु ज्याझ्वलय् नेपाली कांगे्रस बागमति प्रदेशया सभापतिलिसें पुलांम्ह गृह राज्यमन्त्री इन्द्रबहादुर बानिया मूपाहांकथं झायादीगु खः ।
ज्याझ्वलय् नेपाली कांगे्रसया केन्द्रीय दुजः ध्यानगोविन्द रंजित, येँ महानगरया पूर्व प्रमुख विद्यासुन्दर शाक्य, बागमिति प्रदेश सांसदलिसें नेपाल तेक्वान्दो संघ बागमति प्रदेशया उपाध्यक्ष विराजभक्त श्रेष्ठ, २१ वडाअध्यक्ष उदय चुडामणि वज्राचार्य लगायत पाहां कथं झायादीगु खः ।
क्लबया वार्षिकोत्सवया लसताय् जूगु थीथी ज्याझ्वलय् ग्वाहालि यानादीपिं व कासाय् उत्कृष्ट जुयादीपिंत मतिनाया चिं नापं सिरपाः नं लःल्हाःगु खः ।
LEAVE YOUR COMMENTS