एमालेया दलित नेतात मन्त्री श्रेष्ठया विरोधय्

येँ -नेकपा एमाले दुनेया दलित नेतातय्सं मन्त्री कृष्णगोपाल श्रेष्ठं राजीनामा बीमाःगु माग याना हःगु दु । मन्त्री श्रेष्ठं जातीय भेदभाव यात धाःगु द्वपं लाःम्ह मय्जु सरस्वती प्रधानयात थःगु हे गाडीइ तयाः छेँय् त्वःता थकूगु खँयात कयाः पार्टी दुनेया दलित नेतातय्सं थ्व माग याना हःगु खः । उमिसं मन्त्री श्रेष्ठं गलत ज्या याःगु धासें वय्कलं राजीनामा बीमाः वा वय्कःयात प्रधानमन्त्रीपाखें हे चीकेमाः धकाः माग याःगु खः ।

तर प्रम ओलीं थुकिया बारे मन्त्री श्रेष्ठयात सचेत याये धुनागु जूगुलिं थुकियात कयाः वय्कलं स्पष्ट यानादी धकाः लिसः बियादीगु खँ सीदुगु दु । मन्त्री श्रेष्ठं नं थम्हं यानागु ज्या गल्ती जुल धासें आवंलि अथे मयायेगु खँ धयादीधुंकूगु खँ सीदुगु दु ।

थ्वहे झ्वलय् मन्त्री श्रेष्ठ विरुद्ध पार्टी दुने व पिने समेत विरोध याना हःगुलिं वय्कःया पक्षय् स्थानीय लिसें पार्टी दुनेया नेवाः कार्यकर्तातय्सं नं सः तयाहःगु दु । सामाजिक सञ्जालय् वय्कःया पक्षय् सः तयाहःगु दु । लिसें पार्टी दुने वय्कःयात यक्व विरोध वल धाःसा पार्टी दुने च्वंपिं नेवाः कार्यकर्तातत समेत खुले जुयाः वये फइगु खँ धाःगु दु ।