बेलायतं हःगु पुरातात्विक सामग्री संग्रहालयय्
येँ(नेपालभाषा टाइम्स)÷बेलायतं लित हःगु निगू सांस्कृतिक व पुरातात्विक महत्वया कलात्मक सामग्री राष्ट्रिय संग्रहालययात लःल्हाःगु दु । पुरातत्व विभागं बेलायतं नेपाः लित हःगु सांस्कृतिक व पुरातात्विक महत्वया कलात्मक वस्त व मूर्ति संग्रहालययात लःल्हाःगु खः ।
वंगु वालय् विभागय् जूगु छगू ज्याझ्वःया दथुइ विभागया महानिर्देशक दामोदर गौतमं संग्रहालयया निर्देशक जयराम श्रेष्ठयात लःल्हानादीगु खः । संग्रहालययात लःल्हाःगु सांस्कृतिक व पुरातात्विक महत्वया सामग्रमध्ये छगू कलात्मक त्वरं खःसा मेगु प्रस्तर कलाया नमस्कार यानाच्वंगु भक्तया मूर्ति जूगु खँ विभागं जानकारी बिउगु दु ।
कलात्मक त्वरं कला शैलीया ल्याखं १७ वा १८ औं शताब्दीपाखे निर्माण जूगु व भक्तया मूर्ति १६ वा १७ औं शताब्दीपाखेया जूगु विभागं न्ह्यथंगु दु । उगु त्वरं येँ महानगरपालिका वडा नं. २३ वसन्तपूस्थित कुमारि बहाःया जूगु व बहाः दुहां वनेगु लुखा च्वय् च्वंगु उगु त्वरं सन् १९८०–९०या दशकपाखे खुया यंकूगु खँ धाःगु दु । अथे हे प्रस्तरकलाया भक्तया मूर्ति नं २३ वडा हे जूगु व उगु मूर्ति ओमबहालं सन् १९८० पाखें खुया यंकूगु खः।
खुया यंकूगु कलात्मक सामग्री थीथी माध्यम जुयाः बेलायतया लन्दनय् थ्यंगु व थुपिं सामग्री नेपाःया जूगु पुष्टि जुइवं लन्दनस्थित मेट्रोपोलिटन पुलिसया ग्वाहालिइ २०२२ मार्च १८ य् बेलायतस्थित नेपाली दूतावासयात लःल्हाःगु खः ।
निगुलिं पुरातात्विक महत्वया सामग्री नेपाली दूतावास, बेलायतया लन्दनस्थित मेट्रोपोलिटन प्रहरी, नेपाल सरकारया पर्यटन व अर्थ मन्त्रालयपाखें समन्वय यानाः नेपाः लित हःगु खः । निगुलिं सामग्री संस्कृति, पर्यटन तथा नागरिक उड्डयन मन्त्रालया बीमा व ढुवानी खर्चय् नेपाः लित हःगु खः।
आतकया दुने भारत, तिब्बत, अमेरिका, बेलायत, जर्मनी, इटाली, अस्ट्रिया, यरोपेली नागरिक लगायतपाखें ९३ गू कलात्मक वस्तु नेपाः लित हयेधुंकूगु दु । नेपाः लितः हःगु थुपिं सामग्रीत कानूनी प्रक्रिया पूवंकाः खुया यंकूगु थासय् हे प्रतिस्थापन यायेगु विभागं जानकारी बिउगु दु ।
LEAVE YOUR COMMENTS