विप्लवलिसे सरकारया वार्ता

येँ (नेपालभाषा टाइम्स)- गृहमन्त्री बालकृष्ण खाँणं नेत्रविक्रम चन्द नेतृत्वया नेकपायात राजनीतिक मूलधारय् हयेत सरकार व विप्लव पुचःया दथुइ निगू पक्षीय वार्ता जूगु खँ धयादीगु दु । गृहमन्त्री खाँणं नेकपाया प्रवक्ता खड्गबहादुर विश्वकर्मालिसे निन्हु न्ह्यः भैरहवाय् वार्ता जूगु खँ नं कनादीगु दु । म्हिगः रुपन्देहीइ जूगु ज्याझ्वलय् सम्बोधन यायेगु झ्वलय् गृहमन्त्री खाँणं उगु खँ कनादीगु खः ।

उकथं हे वय्कलं वार्ताया झ्वलय् जेलय् लानाच्वंपिं बन्दीयात प्रक्रिया मिले यानाः त्वःतेगु, मुद्दा लित कायेगु विषयय् नं सहलह जूगु खँ धासें धयादिल, ‘पुलांगु सरकारं याःगु सम्झौता कथं गुलिखे बन्दी त्वःतेधुनागु दु, मेपिंत नं त्वःतेत कानुन संशोधनया नितिं फाइल मन्त्रालयय् छ्वयेधुनागु दु ।’

गृहमन्त्री खाँणं नेकपाया नेता कार्यकर्तां निर्वाचनय् ब्वति काल धाःसा प्रशासनं मज्वनेगु व मेपिं नागरिक सरह मतदान याकेत ह्वःताः बीगु प्रस्ताव यानागु खँ नं कनादिल । शान्तिपूर्ण रुपं मतदान याः वल धाःसा प्रशासनं मज्वनेगु बचं थम्हं बियागु धासें तर मतदान स्यंकेत स्वल धाःसा सरकार सुम्क मच्वनेगु ख्याच्वः नं बियादीगु दु । उकथं हे गृहमन्त्री खाँणं निर्वाचन शान्तिपूर्ण रुपं क्वचायेकेत व विद्रोहया लँपुइ वनाच्वंगु पुचःयात मूलधारय् हयेत थरुहट पुचःलिसे नं सरकारं वार्ताया कुतः यानाच्वनागु खँ कनादीगु दु ।