एमसीसी- नेतातय् बैठक, कार्यकर्ताया प्रदर्शन
येँ – सत्ता गठबन्धनया शीर्ष नेतातय् दथुइ बैठक म्हिगः नं छुं हे निष्कर्ष पिमकासे क्वचाल । प्रधानमन्त्री निवास बालुवाटारय् च्वंगु बैठक निष्कर्ष पिमकासे क्वचाःगु खःसा कन्हय् हाकनं बैठक च्वनीगु जूगु दु ।
म्हिगःया बैठकय् नेकपा एसया अध्यक्ष माधव नेपालं थौं थःगु पार्टीया स्थायी कमिटीया बैठक दुगु व वयां लिपा एमसीसी सम्बन्धय् थःपिनिगु धारणा क्वःछीगु जुइ धासें बैठक लिछ्यायेत इनाप यानादीगु खः । नेपालया आग्रह लिपा कन्हय् बैठक च्वनेगु कथं म्हिगःया बैठक क्वचाःगु खः ।
बैठक च्वने न्ह्यः नेकपा माओवादी केन्द्रया अध्यक्ष पुष्पकमल दाहालया निवास खुमलटारय् एमसीसीया विपक्षय् दुपिं नेतातय् दथुइ सहलह जूगु खः ।
थ्वहे झ्वलय् एमसीसीयात कयाः म्हिगः नं सत्तारुढ दल नेकपा माओवादी केन्द्र व नेकपा एकीकृत समाजवादी पार्टीया कार्यकर्तातय्सं न्हू बानेश्वरय् प्रदर्शन याःगु दु । म्हिगः प्रदर्शनकारीतय्सं अन हे सतकय् टायर च्याकाः प्रदर्शन याःगु खः ।
म्हिगः माओवादीया अखिल क्रान्तिकारी व वाईसीएल लिसें नेकपा एसया कार्यकर्तातय्सं प्रदर्शन याःगु खः । प्रदर्शनया झ्वलय् प्रदर्शनकारीतय्सं ‘एमसीसी चाहिँदैन, देश बेच्न पाइदैँन’ नारा थ्वयेकूगु खः । प्रदर्शनया कारणं म्हिगः न्हिछि धइथें न्हू बानेश्वरय् सतक अवरुद्ध जूगु खः ।
एमसीसी विरुद्ध प्रदर्शन जुइगु सम्भावनायात ध्यानय् तयाः म्हिगः न्हू बानेश्वरय् आपालं प्रहरी परिचालन याःगु दु । महानगरीय प्रहरी कार्यालय रानी पोखरीया कथं संसद भवन जःखःया क्षेत्रय् उच्चस्तरया सुरक्षा बियातःगु खः । म्हिगः उगु क्षेत्रय् प्रहरी गणं रिजर्भ फोर्स नं हयातःगु खःसा लः छ्वाकीगु गाडी नं हयातःगु खः । म्हिगः नं थीथी कम्युनिष्ट पार्टीतय्सं एमसीसी विरुद्ध नेपाल बन्दया घोषणा यानातःगु खःसा उकियात ध्यानय् तयाः सरकारं येँय् सुरक्षा व्यवस्था बढे याःगु खः । एमसीसी विरुद्ध थीथी दलया भातृ संगठनतय्सं न्हिंन्हिं हे सतकय् वयाः प्रदर्शन याना वयाच्वंगु दु ।
LEAVE YOUR COMMENTS