
थिमि – मध्यपुर थिमि नगरपालिकाया चार दोबोटोस्थित खुगू लेनया सतकय् वृक्षारोपण यायेगु ज्या जूगु दु । सुन्दर नगर टोल सुधार समिति व प्रोगेसिभ फाइनान्सं मंकाःकथं विश्व सुख्खा विरुद्धया संघर्ष दिवसया सन्दर्भय् लाकाः उगु वृक्षारोपण याःगु खः ।सामाजिक उत्तरदायित्व अन्तर्गत हरियाली प्रवद्र्धनया निंतिं निगू संस्थां मंकाःकथं वृक्षारोपण यानागु संयोजक पुनम वज्राचार्यं कनादिल ।
प्रदेश नं. ३ या सांसद डा. राजेन्द्रमान श्रेष्ठं ज्याझ्वःया उलेज्या यानादिसें वृक्षारोपणया आवश्यकता व हरियाली प्रवद्र्धनं निंतिं मानव जीवनय् म्हितीगु सकारात्मक भूमिकायात कयाः चर्चा यानादिल । वय्कलं धयादिल, ‘झीसं वृक्षारोपण यायेगु जक मखु, उकियात ब्वलंकेत निरन्तर रुपं सुसाःकुसाः यायेगु व व्यवस्थापन यायेगु खँय् नं ध्यान बिया वनेमाःगु आवश्यक जू ।’
ज्याझ्वलय् मध्यपुर थिमि नगरपालिका वडा नं. ३ या वडाअध्यक्ष प्रेम कुटु, टोल सुधार समितिया भुवनचरण श्रेष्ठ, स्थानीय ज्येष्ठ नागरिक लक्ष्मीनारायण श्रेष्ठ, महानगरीय प्रहरी वृत्त थिमिया प्रहरी निरीक्षक दिपक केसी लिसें स्थानीय बुद्धिजीवी व पत्रकारतय् नं सहभागिता दुगु खः ।
LEAVE YOUR COMMENTS