ओलम्पस क्लबया भिंतुना कालबिल व सफू पित ब्वज्या

येँ- ओलम्पस क्लब ओमबहाःपाखें न्हूदँ ११३९ या लसताय् भिंतुना कालबिल ज्याझ्वः जुल । थनया येँ मनपा वडा नं. २३ स्थित नबहिलीइ जूगु ज्याझ्वलय् प्रा. सुवर्ण शाक्यं च्वयादीगु ‘वय्कःपिंत लुंमकाबलय्’ नांगु सफूया निगूगु ब्व नं पिथंगु खः ।

ज्याझ्वःया मूपाहां जनकवि दुर्गालाल श्रेष्ठं उगु सफू पितब्वज्या यानादीगु खः । क्लबपाखें दँय्दसं न्हूदँया लसताय् उकथं तुच्चा ज्याझ्वः याना वयाच्वंगु खःसां थुगुसी धाःसा नेपाल संवत् आन्दोलनया प्रणेता पद्मरत्न तुलाधर मदुगु दुःखय् उकथंया ज्याझ्वः मयासें सामान्यकथं जक ज्याझ्वः यानागु क्लबया नायः पवित्र वज्राचार्यं कनादिल ।

क्लबया छ्यांजे ज्योति शाक्यं लसकुस यानादीगु ज्याझ्वलय् पितब्वज्या जूगु सफूया च्वमि प्रा. शाक्यं सफूयात कयाः नुगःखँ तयेगु झ्वलय् नेपाल संवत्या सांस्कृतिक आन्दोलनया अभियन्ता पद्मरत्न तुलाधर झी दथुइ मदुसां वय्कः न्ह्याबलें नं झीगु नुगलय् दयाच्वनी धयादिल । ज्याझ्वलय् प्रतिनिधिसभा सदस्य कृष्णगोपाल श्रेष्ठ, येँ मनपाया उपमेयर हरिप्रभा खड्गी, भृगुराम श्रेष्ठ, राजा शाक्य, डा.पुष्पराज राजकर्णिकर लगायत विशिष्ट व्यक्तित्वपिनिगु उपस्थिति दुगु खः ।