नेवाः कवयित्रीपिनि अनलाइन कविता वाचन ज्याझ्वः
येँ (नेपालभाषा टाइम्स)-‘कविताया लाय्कू’ नांगु न्हूगु साहित्यिक संस्थापाखें नेपालभाषाया न्हूपिं कवयित्रीपिनि अनलाइन कविता वाचन ज्याझ्वः यात । कवयित्रीपिं जक जानाः नीस्वंगु ‘कविताया लाय्कू’ पाखें याःगु थ्वहे न्हापांगु ज्याझ्वः खः ।
संस्थाया नायः भाषाशास्त्री लिसें समिक्षक डा. ज्योति तुलाधरया सभापतित्वय् जूगु उगु ज्याझ्वलय् कवयित्रीपिं मंजु श्रेष्ठ सिंह, रहेना नकःमि मानन्धर, सुधीर ख्वबि, हिसिलिना शाक्य, ज्ञान केशरी कायस्थ, मिनर्वा शर्मा राजोपाध्याय, रुपा शाही, मिमला शर्मा, रश्मि नापित, सविना महर्जन, बिनिता बज्राचार्य, दिल कुमारी महर्जन व शोभा महर्जनपिंसं कविता वाचन यानादीगु खः ।
अथे हे पाहां कविपिं रामेश्वर मिश्रण श्रेष्ठ, वसन्त नकःमि, अर्जुन नेपाःमि, नवीन प्रकाश श्रेष्ठ व कविन्द्रलाल प्रधानं नं कविता न्यंकादीगु खः ।
वाचित कविताय् मिसा जीवन व अस्तित्व दुवालाः नेपाल प्रज्ञा प्रतिष्ठानया पुलांम्ह प्राज्ञ लक्ष्मी मालीं समिक्षा यानादीगु खःसा कविताय् सामाजिक व राजनीतिक पक्षयात कयाः साहित्यकार मल्ल के. सुन्दरं दुवालादीगु खः ।
ज्याझ्वलय् विशिष्ट श्रोता कथं पाहां साहित्यकार केदार सितुं थःत यःगु कविता कथं कवि योगेन्द्र प्रधानया ‘धरती थ्व श्रृजना मगाःम्ह’, कालिंपोंगया कवि मनोज बोगटीया ‘हां मैं काला, अर्थात काला, अर्थात रंग नहीं’ व रघुवीर सहायया ‘अगर कहीं मैं तोता होता’ शीर्षकया कविता पाठ यानाः न्यंकादीगु खः ।
कवयित्री रजनी मिलां सहजीकरण यानादीगु उगु ज्याझ्वलय् कविताया लायकूया न्वकु हिसिलिना शाक्यं लसकुस यानादीगु खः ।
LEAVE YOUR COMMENTS