न्हूपिं संघनायक व संघउपनायक पदस्थापन

येँ – अखिल नेपाल भिक्षु महासंघपाखें न्हूम्ह संघनायक कथं भिक्षु ज्ञानपूर्णिक महास्थविरयात पदस्थापन याःगु दु । वसपोल न्हय्म्हम्ह संघनायक खः । खुम्हम्ह संघनायक भिक्षु अश्वघोष महास्थविरया निधन जूगुलिं भिक्षु ज्ञानपूर्णिक महास्थविरयात संघनायक ल्यःगु खः । उकथं हे न्हूम्ह संघउपनायक कथं भिक्षु बोधिसेन महास्थविरयात पदस्थापन याःगु दु ।

संघनायक भिक्षु ज्ञानपूर्णिक येँया विश्वशान्ति विहारया प्रमुख लिसें महासंघया पुलांम्ह नायः व वर्तमान धर्मानुशासक खः । अथे हे संघउपनायक भिक्षु बोधिसेन भ्वतया बोधिचर्या विहारय् च्वनाबिज्याइम्ह खः ।

महासंघया अध्यक्ष भिक्षु मैत्री महास्थविरया उपस्थितिइ महासंघया धर्मानुशासक, पदाधिकारी लिसें दुजःपिनि दथुइ आइतवाः महासंघया मू ज्याकू विश्वशान्ति विहारय् च्वंगु बैठकं पतिट्ठापनविधिसहित संघसम्मतिं विधिपूर्वक थ्व पदस्थापन याःगु खः । ज्याझ्वलय् संघसदस्य भिक्षुपिनि संघकार्य दथुइ कम्मवाचाकारक भिक्षु धर्मगुप्त महास्थविर व भिक्षु भद्दिय महास्थविरं कम्मवाचा वाचन यानाबिज्याःगु खः ।

सम्बन्धित बुखँ

LEAVE YOUR COMMENTS