रुसया म्युजियमय् कलाकार राजभण्डारीया चित्र

येँ – नेपाल ललितकला प्रज्ञा प्रतिष्ठान (नाफा)या प्राज्ञलिसें कलाकार सुष्मा राजभण्डारीया किपा रुसया छगू म्युजियमय् तःगु दु । प्राज्ञ राजभण्डारीं च्वयादीगु गणेद्यःया किपायात रुसया ‘एसियन म्युजियम’य् तःगु खः ।विश्वय् लोकंह्वाःगु रुसया उगु म्युजियमय् थम्हं सिर्जना याःगु चित्रं नेपाःया प्रतिनिधित्व यायेखंगु खँय् लसता प्वंकादिसें प्राज्ञ राजभण्डारीं थ्व नेपाः व नेपाःमिया निंतिं हे गौरव जूगु खः धयादिल ।

एसियाया थीथी देय्या नांजाःपिं व अग्रज कलाकारतय् कलाकृति तयातःगु म्युजियमय् नेपाःयापाखें कलाकार राजभण्डारीया उगु किपा निक्वःखुसी दुथ्याःगु प्रतिष्ठानं जानकारी बिउगु दु ।थ्व स्वयां न्ह्यः तात्कालीन जुजु महेन्द्रं रुसया भ्रमण यानादीगु इलय् वय्कःलिसें भ्रमण पुचलय् दुथ्याःम्ह वरिष्ठ कलाकार चन्द्रमान सिंह मास्केया कृति म्युजिमय् तःगु खः ।

थ्व हे झ्वलय् कलाकार राजभण्डारीं रुसया राजधानी मस्कोय् वंगु जेठ २२ निसें ३२ गतेतक थःगु झिंखुक्वःगु एकल चित्रकला ब्वज्या नं यानादीगु खः । ब्वज्याय् वय्कःया थीथी स्वीपाः स्वयां अप्वः कृति दुथ्याःगु खःसा छुं चित्र विदेशी कूटनीतिक नियोग, विदेशी कलाकारलिसें गैर आवासीय नेपाःमिं तकं न्याना काःगु खः ।