काठमाडौं मोडेल स्कुलय् दीक्षान्त समारोह
येँ- थनया काठमाडौं मोडेल स्कुलया थीथी तगिमय् ब्वने क्वचाये धुंकूपिं मस्तय् सम्मानय् छगू ज्याझ्वः जुल । काठमाडौं मोडेल दीक्षान्त समारोह–२०७४या नामं जूगु ज्याझ्वलय् ब्वनेकुथिया स्वंगू तह पूर्व–प्राथमिक, आधारभूत व माध्यमिक विद्यालय ब्वने क्वचाये धुंकूपिं विद्यार्थीतय्त हनेज्या याःगु खः ।
ब्वनेकुथिया संस्थापक निर्देशक राजेन्द्र महर्जनया सभापतित्वय् जूगु ज्याझ्वलय् नेशनल प्याब्सन ३ प्रदेशया सचिव भूपेन्द्र खत्री मूपाहांकथं झायादीगु खः । ज्याझ्वलय् विशेष पाहांकथं फ्युचर स्टार इंग्लिश स्कुलया प्रिन्सिपल नापं नेशनल प्याक्सनया केन्द्रीय दुजः मनोजकुमार श्रेष्ठ, नेपाल शिक्षक संघ येँ जिल्लाया अध्यक्ष रविन महर्जन झायादीगु खः ।
ब्वनेकुथिया नवनियुक्त प्रिन्सिपल रविन महर्जनं लसकुस यानादीगु ज्याझ्वलय् यु. के. जी. तगिं ब्वने क्वचायेकादीपिं विद्यार्थीतय्त विशेष पाहां महर्जनं दसिपौ व काठमाडौं मोडेल स्कुलया प्रिन्सिपल महर्जनं लुमन्ति चिं लःल्हानादीगु खः । अथे हे आधारभूत तह क्वचायेकादीपिं विद्यार्थीतय्त विशेष पाहां मनोजकुमार श्रेष्ठं स्कार्फ न्ययेकादीगु खःसा ब्वनेकुथिया निर्देशक महर्जनं मतिनाया चिं लःल्हानादिल ।
थुकथं हे माध्यमिक विद्यालय तह ब्वने क्वचायेकादीपिं विद्यार्थीतय्त मूपाहां खत्रीं स्कार्फ न्ययेकादीगु खःसा ब्वनेकुथिया सल्लाहकार तकं जुयादीम्ह प्रभात मा.वि.या पुलांम्ह प्रधानाध्यापक नातीकाजी महर्जनं मतिनाया चिं लःल्हानादिल ।
ज्याझ्वःया मूपाहां एन प्याब्सन ३ नं. प्रदेश संयोजक खत्रीं काठमाडौं मोडेल स्कुलय् ब्वनाच्वंपिं विद्यार्थीतय् निंतिं वइगु दिनय् छुं नं कथंया आपत जुइगु इलय् ग्वाहालि यायेकथं विद्यार्थी कल्याकारी कोष स्वनेत प्रोत्साहकथं न्याद्वः तका दां ग्वाहालि यानादीगु खः ।
ब्वनेकुथिया थीथी तगिमय् ब्वनाच्वंपिं नच्चापिं विद्यार्थीतय्सं हुलाप्याखंलिसें अर्केष्ट्रा नं न्ह्यब्वःगु ज्याझ्वलय् ब्वनेकुथिया पुलांपिं ब्वनामिपिं थिन्ले नोर्बु तामांग व रेइना महर्जनं म्येँ न्यंकादीगु खः ।
ज्याझ्वलय् ब्वनेकुथिया निर्देशक महर्जनं मूपाहां, विशेष पाहां, पाहां नापं ग्वाहालि यानादीपिंत मतिनाया चिं लःल्हासें सुभाय् देछानादीगु खः ।
LEAVE YOUR COMMENTS