येँयात जीवन्त सांस्कृतिक सहर दयेकेगु अभियान
येँ- येँ महानगर पालिकाया प्रमुख विद्यासुन्दर शाक्यं थः येँ देय्यात जीवन्त सांस्कृतिक सहर दयेकेगु अभियानय् लगे जुयाच्वनागु खँ धयादीगु दु । येँ देय्या इतिहासयात बचे यानाः जीवन्त सांस्कृतिक सहर दयेकेगु अभियानय् थः निरन्तर रुपं लगे जुयाच्वनागु खँ वय्कलं धयादीगु दु ।
वय्कलं उगु खँ थनया न्यत त्वालय् त्वंगु ऐतिहासिक, सांस्कृतिक व धार्मिक महत्वं जाःगु न्यतभलु अजिमा द्यःयात आर्थिक ग्वाहालि लःल्हायेगु ज्याझ्वलय् धयादीगु खः ।
ज्याझ्वलय् नवासें येँ महानगर प्रमुख शाक्यं ई व परिस्थितिया कारणं जात्रा, पर्व संचालनय् खर्च अप्वया वनाच्वंगु यथार्थ न्ह्यब्वयादिसें खर्च मदुगुलिं गुलिखे जात्रा, पर्व दिना वनाच्वंगु खःसां आः अज्याःगु अवस्था वयेके बीमखु धयादिल । थनया मूर्त अमूर्त सम्पदा संरक्षणया निंतिं थौंकन्हय् गुलि नं ज्या जुयाच्वंगु व थःपिनिगु क्षमता स्वयां अझ अप्वः याये फइगु अवस्था दुगु खःसां निकायगत समन्वया अभाव व समस्याया कारणं अथे जुइ मफयाच्वंगु वय्कलं धयादिल । आवश्यक स्रोत दुसां नं पुरातत्व विभाग, गुथि संस्थानपाखें आवश्यक ग्वाहालि मजूगुलिं गुलिखे सम्पदा संरक्षणया ज्या न्ह्याके मफयाच्वंगु वय्कलं धयादिल ।
उगु इलय् महानगर प्रमुख शाक्यं न्यतमदु अजिमाया मू धामिलिसें परम्परागत न्यत त्वाःया पुलांम्ह नायः मदु्म्ह लक्ष्मीनारायण महर्जनया झ्वाता नं उलेज्या यानादीगु खः । ज्याझ्वलय् उपप्रमुख हरिप्रभा खड्गी श्रेष्ठं स्थानीय सरकारया ज्या व जिम्मेवारी धइगु हे स्थानीय भाषा, कला, साहित्य, संस्कृति संरक्षण यायेगु खः धासे व हे कथं ज्या जुयाच्वंगु धयादिल ।
येँ महानरपालिका १८ वडाअध्यक्षलिसें सम्पदा व पर्यटन समितिया संयोजक न्हुछेकाजी महर्जनं गुथि परम्परायात महानगरं ग्वाहालि याइ धासें अज्याःगु गुथि वडाय् जक दर्ता जूसां गाःगु जानकारी बियादिल । वय्कलं वडाय् च्वंपिं थीथी ख्यलय् च्वछायेबहगु योगदान बियादीपिनिगु झ्वाता तयेगु ज्या जुयाच्वंगु धासें स्वरसम्राट नारायणगोपाल गुरुवाचार्य, महाकवि चित्तधर हृदय, राष्ट्रिय विभूति शंखधर साख्वाया झ्वाता दयेकेगु ज्या जुयाच्वंगु जानकारी बियादिल ।
येँ महानगरं प्रत्येक झिंनिदँय् छक्वः जुइगु न्यतमदु अजिमाया जात्राया निंतिं २८ गू लख तका दां बीगु जूगु दु । थ्व झ्वलय् वंगु आइतवाः जूगु ज्याझ्वलय् जात्राया निंतिं पेश्की वापत १६ गू लख ८० द्वः तका दां श्री श्वेतकाली संरक्षण तथा व्यवस्थापन समितियात लःल्हानादीगु खः ।
थुगुसी न्यतमदु अजिमाया झिंनिदँया प्याखं थ्व हे वइगु चैत १४ गतेनिसें शुरु जू वनाच्वंगु दु ।
LEAVE YOUR COMMENTS