थनिंनिसें कालिमाटी बजाः चालीगु, विकास समिति विघटन यायेत माग

येँ – कालिमाटी तरकारी तथा फलफुल विकास समितियात तत्काल विघटन यायेत माग याःगु दु । राष्ट्रिय उपभोक्ता मञ्चं प्रधानमन्त्रीया नामय् छपु पौ च्वसें कालिमाटी तरकारी बजारय् विकास समितिया कर्मचारी व पदाधिकारीतय् हे कारणं उपभोक्तातय्सं दशौं गुणा अप्वः ध्यबा पुलाः तरकारी न्यायेमालाच्वंगु धासें मञ्चं उगु विकास समिति हे विघटन यायेत माग याःगु खः ।

मञ्चं विकास समिति खारेज यानाः उकिया थासय् सर्वसाधारण व निजी साझेदारीइ नेपाल सरकारया स्वामित्व सहितया न्हूगु हे कम्पनी चायेकाः कालिमाटी तरकारी बजाःया व्यवस्थापन यायेमाःगु सुझाव नं बिउगु खः । मेखे म्हिगः आन्दोलनय् कुहां वयाः कालिमाटी तरकारी बजाः बन्द याःपिं व्यापारीतय्सं थनिंनिसें हाकनं बजाः चायेकीगु जूगु दु ।

कालिमाटी बजारय् सोमवाः जूगु सरकारी अनुगमनया इलय् ल्वापु जुइवं तरकारी तथा फलफुल व्यवसायी महासंघया महासचिव भरत खतिवडायात ज्वन धकाः अनिचितकालिन बजाः बन्द याःगु खः । आः खतिवडायात मत्वःतुनिसां बजाः बन्दं यानाः कृषक व व्यापारीतय्त समस्या जुइगु धासें बजाः चायेकूगु खः । महासंघं थःपिनि आन्दोलन धाःसा जारी हे दनिगु खँ धाःगु दु ।

थनया बिचौलिया (दलाल) व्यापारी व विकास समितिया पदाधिकारीतय् मिलोमतोया कारणं तरकारीया भाः तसकं थिकेक पुले मालाच्वंगु खँ न्ह्याबलें पिहां वयाच्वंगु दु । न्हूम्ह कृषि मन्त्री, आपूर्ति मन्त्री वयेधुंकाः तःक्वः हे अनुगमन जूसां आःतक थुमित चीके धाःसा फुगु मदुनि ।