मेलम्चीया लखं बागमति खुसिबाः वइगु

येँ -मेलम्चीया लः परीक्षण याइबलय् येँया बागमति खुसिइ खुसिबाः वये फइगु खँ धाःगु दु । मेलम्ची खानेपानी विकास समितिं सुरुङ परीक्षणया झ्वलय् छ्वया हइगु लः तप्यंक बागमति खुसिइ वइगु जूगुलिं सजग जुइत नं इनाप याःगु दु ।

वंगु फागुन १० गते निसें मेलम्ची खुसिया लः सुन्दरीजलय् छ्वया हयेगु क्रम शुरु जूगु खः । सुरुङं वःगु छुं प्रतिशत लः बागमति खुसिइ ल्वाकज्यानाः लःया सतह अप्वइगु जूगुलिं सजग जुइत आयोजनां इनाप याःगु खः । मेलम्ची खानेपानी विकास समितिया कथं वइगु छन्हु निन्हुया दुने मेलम्चीया लः सुन्दरीजल थ्यंकः वइ । थ्वहे झ्वलय् आयोजनां सुन्दरीजलंनिसें बल्खु तक माइकिङ यायेगु योजना दयेकातःगु दु ।

वंगु स्वंगू दशक न्ह्यवंनिसें दयेकेगु ज्या न्ह्याःगु आयोजनाया सुरुङ दयेकेगु ज्या वंगु दँय् क्वचाःगु खःसां नं सुरुङ परीक्षण वंगु असारय् तिनि याःगु खः । उगु परीक्षणया झ्वलय् सुरुङया खापा चालाः दुर्घटना जूगु खः । उगु दुर्घटनाय् लानाः गाडी चालक व छम्ह इन्जिनियर सीगु खः ।

वयां लिपा समितिं अन दुगु त्रुटियात भिंकाः हाकनं परीक्षण याःगु खः । आः जुयाच्वंगु परीक्षणया झ्वलय् सुरुङय् गुगुं नं कथंया समस्या मजुल धाःसा वइगु लछिया दुने हे स्वनिगलय् लः इनेगु ज्या जुइगु खँ धाःगु दु । स्वनिगलय् लः इनेगु ज्या काठमाडौं उपत्यका खानेपानी लिमिटेड (केयूएकेलं) याइगु खँ धाःगु दु ।

सम्बन्धित बुखँ

LEAVE YOUR COMMENTS