प्रदेश १ य् नामाकरण हे चुनावी मुद्दा

येँ (नेपालभाषा टाइम्स)- न्हूगु संविधान कार्यान्वयन जुइवं अस्तित्वय् वःगु न्हय्गू प्रदेश मध्ये खुगूया नामाकरण जुल, प्रदेश नं. १ या नामाकरण धाःसा आः तक जुइ मफुनि । प्रदेशया नां तयेगु ज्या मयासे हे वर्तमान प्रदेश सभाया कार्यकाल क्वचाइगु जूगु दुसा आः जुइगु चुनावय् प्रदेशया नामाकरण हे मू चुनावी मुद्दा जुइ फइगु खँ धाःगु दु ।

प्रदेशया नां छु तयेगु धइगु खँय् प्रदेश सभाय् न्ह्याक्व हे सहलह याःसां नं पार्टीया वरिष्ठ नेतातय्सं स्वीकृति मबिउगु कारणं यानाः नां तये मफुगु खँ अनया सांसदतय्सं कनेगु यानाच्वंगु दु ।

प्रदेशया नां पहिचानया आधारय् तयेगु लाकि भूगोलया आधारय् तयेगु धइगु खँय् हे विवाद जुयाः नामाकरण याये मफयाच्वंगु खँ धाःगु दु । पहिचानया आधारय् नां तयेमाः धाइपिनि दथुइ तकं गज्याःगु पहिचान धइगु खँय् विवाद जुयाः पहिचानवादी शक्तित तकं विभाजित जुयाच्वंगु खँ धाःगु दु । पहिचानया सवालय् नं थःपिनिगु हे सरोकार दुगु नां तयेमाः धकाः थीथी पहिचानवादी पार्टी व संस्थातय्सं उगु प्रदेशया थीथी थासय् धर्ना, जुलुस याना बिउगु कारणं प्रदेश सभां झन् हे नां तयेगु हिम्मत याये मफुगु खँ धाःगु दु ।

आः न्ह्यःने वयाच्वंगु संसदया चुनावय् राजनीतिक पार्टीतय्सं प्रदेशया नामाकरण छाय् मजुल धइगु खँय् छम्हं मेम्हेसित ब्वः बियाः प्रचार याइगु खने दयाच्वंगु दु ।