किपूयात कयाः चीहाः संकिपा कासा जुइगु

किपू – स्वनिगःया येँ देशं दक्षिणी भेगय् लाःगु ऐतिहासिक व सांस्कृतिक नगर किपूयात कयाः चीहाः संकिपा कासा जुइगु जूगु दु । थुकिया निंतिं किपू नगरपालिकां पलाः न्ह्याकूगु दु ।

थःगु नगरया ऐतिहासिक व सांस्कृतिक पक्षया प्रवद्र्धन व संरक्षण यायेमाः धइगु मू आज्जु ज्वनाः जुइत्यंगु चीहाः संकिपा कासाया निंतिं किपूया थीथी पक्ष कःघानातःगुयात अन्वेषण यायेगु ज्या जुयाच्वंगु खँ किपूया नांजाःम्ह कलाकार लक्ष्मीकुमार महर्जनं जानकारी बियादिल ।

किपूया मेयर रमेश महर्जनं ऐतिहासिक, सांस्कृतिक सम्पदाया बारे चिउताः तयाः बियादीगु निर्देशन कथं हे किपूया बारे चिसंकिपा कासा जुइत्यंगु खँ वय्कलं कनादीगु दु ।चिसंकिपा कासाया तयारीया निंतिं नकतिनि हे जक मेयर महर्जन, उपमेयर सरस्वती खड्कालिसे विजयरत्न असंबरे, पवित्र कसाः, तेज महर्जन, सुरेश मानन्धर, शम्भुराम मान्छे व सुमन श्रेष्ठ दुथ्याःगु विज्ञ पुचः दथुइ सहलह जूगु दु ।

सहलहय् मेयर महर्जनं किपूया इतिहास संरक्षण यायेत थज्याःगु चिसंकिपा कासाया तःधंगु भुमिका दइगु खँय् थः विश्वस्त दुगु खँ धयादीगु खः । चिसंकिपा कासाया निंतिं स्वन्ति सिधयेवं संकिपाःकःमिपिं लिसे नं माःकथं सहलह ब्याकेगु तयारी जुया च्वंगु खँ नं लक्ष्मीकुमार महर्जनं जानकारी बियादीगु दु ।