ने. सं. ११४६ चाैलागा त्रयोदशी - थिमि बालकुमारी जात्रा

शिलखानाय् विहार हे तयेत माग

भिमसेन थापाया सन्तानपाखें दरवार कायम जुइमाःगु दावी

येँ (नेपालभाषा टाइम्स) – येँया २१ वडास्थित लगं त्वालय् पुलांगु विहार नष्ट यानाः भिमसेन थापां दयेकूगु छेँ व सलगः चीकाः आः अन विहार हे कायम यायेमाःगु माग स्थानीय जनतां याःगु दु ।

थौंकन्हय् शिलखाना नं धाइगु उगु थासय् न्हापा छगू बौद्ध विहार दुगु खः । अन्तिम मल्ल जुजु जयप्रकाश मल्लं अन विहार बांलाःगु विहार दयेकाः थः शाक्य कुलपुत्री कलाःपाखें दुम्ह काययात अन हे प्रव्रजित यासें च्वनेगु समेत व्यवस्था याना बिउगु खँ इतिहासय् च्वयातःगु दु। लिपा भिमसेन थापा सत्ताय् वयेधुंकाः उगु विहारया खाली जग्गा कब्जा यातसा वया भिन्चा माथवरसिंह थापा प्रधानमन्त्री जुइधुंकाः विहार समेत अतिक्रमण यानाः अन सलगः दयेकल । लिपा थीथी राजनीतिक घटनाक्रम लिपा उगु थाय् खाली जुयाः अन सेनाया ल्वाभः तयेगु थाय् दयेका तःगु खः गुकिं यानाः थ्व थाय्यात शिलखाना धायेगु यात ।

०७२ सालया भुखाचय् पुलांगु छेँ नं ध्वस्त जुइवं येँ महानगरपालिकां अन भिमसेन थापाया म्युजियम व विहारया अवशेष कथं चैत्य समेत तयाः लगं पार्क दयेकेगु ज्या न्ह्याकूगु खः । थ्वहे इलय् भिमसेन थापाया सन्तानतय्सं अन थापा परिवारया ‘दरवार’ हे कायम जुइमाः धकाः मुद्दा तयाबिल । थुकिं यानाः सर्वोच्चं अन ज्या दिका बिल ।

आः लगंया स्थानीय जनतां उगु थासय् भिमसेन थापाया छेँ वये सिबें न्ह्यः बौद्ध विहार दुगु जूगुलिं विहार हे कायम यायेमाः धकाः सः तया हःगु दु। उगु थासय् पार्क दयेक न्ह्यः नं स्थानीय जनतां पार्कया पलेसा विहार हे दयेकेमाः धकाः येँ मनपाय् निवेदन तःगु खः । तर मनपां विहार व भिमसेन थापाया इतिहास नं कायम यायेगु कथं नितां दुथ्याःगु पार्क दयेकेगु निर्णय याःगु खः ।

थुगु मुद्दायात कयाः सर्वोच्चय् जूगु सहलहय् आः भिमसेन थापाया छेँया जग स्पष्ट जुइक छगू नक्सा दयेकेगु जिम्मा पुरातत्व विभागयात बिउगु दुसा अन जगया सीमा मस्यंक पार्क दयेके फइगु संकेत बिउगु खँ धाःगु दु ।