नागरिकता विधेयक पारित

येँ (नेपालभाषा टाइम्स)- राष्ट्रपतिं पुनर्विचार या धकाः सुझाव सहित लित छ्वया हःगु नागरिकता विधेयक म्हिगः प्रतिनिधि सभां हानं बहुमतं पारित यात । म्हिगः संसदं राष्ट्रपतिं छ्वया हःगु सुझावयात गनं हे उल्लेख मयासे न्हापा गथे छ्वःगु खः पाय्छि अथे हे यानाः पारित याःगु खः ।

नागरिकता ऐन २०६३ संशोधन यायेत हःगु उगु विधेयक वर्तमान सरकारं पारित यानाः प्रमाणीकरणया लागिं राष्ट्रपतियाथाय् छ्वःगु खःसा राष्ट्रपतिं उकी हानं छक्वः बिचाः यानाः जक पारित यासें सुझाव सहित लित छ्वया हःगु खः ।

थ्व विधेयकयात न्हापा लिपा थें ध्वनी मतं पारित याकेगु तयारी जूगु खःसां प्रमुख प्रतिपक्षीं ध्वनी मत प्रणालीयात स्वीकार याये मखु धाःगुलिं मतदान हे यानाः पारित याःगु खः । मतदानय् कुल उपस्थित १९५ म्ह सांसद मध्ये प्रस्तावया पक्षय् १३६ मत व विपक्षय् ६० मत वंगु खः ।

सरकारं नागरिकता ऐनय् संशोधन मजूगु कारणं नेपाली मांअबुपाखें जन्म जूपिं करिब ७ लाखम्ह मस्तय्सं नागरिकता काये मखनाच्वंगु दु धासें विधेयक पारित यायेमाःगु तर्क न्ह्यःने तःगु खः । विपक्षीतय्सं धाःसा थ्व विधेयक पारित जुल धाःसा नेपाली मिजंलिसे इहिपा याना वइपिं भारतीय मिसातय्सं तुरुन्त हे नागरिकता काये खनीगु जूगुलिं उकियात पनेगु लागिं नं विधेयक पारित याये मजिउ धकाः विरोध याना वयाच्वंगु खः ।

एमालें राष्ट्रपतिपाखें सुझाव समेत तयाः विधेयकय् पुनर्विचार या धकाः लित छ्वया हःगु जूगुलिं उकी संसदया निगुलिं सदनय् व्यापक छलफल यानाः जक पारित यायेमाःगु तर्क तया वयाच्वंगु खः । तर सरकारं धाःसा आः विधेयकयात पारित याये लिबाका तये मजिउ धासें पारित याना छ्वयेगु प्रक्रिया न्ह्याकूगु खः ।

आः राष्ट्रपतिं लित छ्वये मंत
राष्ट्रपतिं छ्वया लित छ्वया हःगु विधेयकयात सरकारं छुं हे संशोधन मयासे हानं गथे खः अथे हे राष्ट्रपतियाथाय् छ्वया बिल धाःसा निक्वःगु खुसी राष्ट्रपतिं उकियात प्रमाणीकरण याना बीमाःगु प्रावधान दु । संविधान कथं छुं नं विधेयकयात निक्वः तक लित छ्वये मफइगु जूगुलिं आः राष्ट्रपतिं थ्व विधेयकयात प्रमाणीकरण मयासें मगाःगु खँ कानूनविद्तय्सं धाःगु दु ।

संविधानया धारा ११३ या उपधारा (४) कथं राष्ट्रपतिं लित छ्वःगु अज्याःगु विधेयक हानं पारित यानाः राष्ट्रपतिथाय् छ्वया बिल धाःसा राष्ट्रपतिं १५ न्हुया दुने उकियात प्रमाणकरण याना बीमाः । यदि मयात धाःसा व स्वतः पारित जूगु भाःपी । संविधानविद् डा. विपिन आचार्यं राससयात कनादीकथं आः राष्ट्रपतिं थ्व विधेयकयात थुनछेक याना तये दइ मखु, सुम्क प्रमाणीकरण याना छ्वयेमाः ।

सम्बन्धित बुखँ

LEAVE YOUR COMMENTS