निगू अस्पतालया फोहोर मुनेगु बन्द
येँ (नेपालभाषा टाइम्स)÷ यँे महानगरपालिकां न्हू बानेश्वरय् च्वंगु एएसजी आइ केयर व नेपाल स्किन हस्पिटलया फोहोर उठे मयाइगु जूगु दु । येँ महानगरपालिकां म्हिगः याःगु अनुगमनया झ्वलय् उगु स्वास्थ्य संस्थां संक्रमित फोहोर स्रोतय् वर्गीकरण मयाःगु, हानीकारक फोहारयात निर्मलीकरण याइगु अटोक्लेभ थेंज्याःगु साधन व उपकरण प्रणाली मदुगु व लिपांगु व्यवस्थापन यायेबलय् सामान्य फोहोर लिसे ल्वाकछ्यानाः छ्वयेगु यानाच्वंगुलिं फोहोर उठे यायेत पनाबिउगु खः ।
निगुलिं स्वास्थ्य संस्थाय् थीथी रंगया संकेत दइ कथं जोखिमपूर्ण फोहोर तयेगु बिस्कं बिन तयामतःगु लूगु खँ नं येँ मनपां धाःगु दु । छगः हे बकेटय् फुक्कं फोहोर मुंकेगु यानाच्वंगु लूगु खँ नं येँ मनपां धाःगु दु ।
छगः हे बकेटय् प्वः चिनातःगु फोहोर आइ केयरं सवारी पार्किङ यायेगु थाय्या छगू कुनय् तयातःगु खःसा स्किन अस्पतालं छेँयया कःसिइ तयातःगु लूगु खँ येँ मनपाया वातावरण व्यवस्थापन विभागया फोहोरमैला व्यवस्थापन महा– शाखा प्र्रमुख कविता राईं कनादीगु दु ।
विभाग प्रमुख राईं धयादिल, ‘न्ह्याक्व हे दुसां संक्रमित फोहोर हानीकारण हे जुइ । स्वास्थ्य संस्थां जोखिमयुक्त फोहोरयात जोखिममुक्त दयेकेगु गुगुं नं उपाय नालाकाःगु खनेमदु । थुकिया सम्भावित जोखिम म्हो यायेत थ्व स्वास्थ्य संस्थापाखे उत्पादन जुइगु फोहोर मुनेगु ज्या पनाबियागु खः ।’
थ्व स्वयां न्ह्यः वंगु सोमवाः याःगु अनुगमनया झ्वलय् समस्या खने दयेवं थनया कलंकीइ च्वंगु नेपाल नेशनल हस्पिटलया फोहोर मुनेगु ज्याय् येँ मनपां पनाबिउगु खः ।
LEAVE YOUR COMMENTS