ने. सं. ११४४ कौलाथ्व पारू - नःलास्वनेगु

वीर अस्पताल पिनेया निगू वासः पसः तीकल

येँ (नेपालभाषा टाइम्स)-स्वास्थ्य तथा जनसंख्या मन्त्री मोहनबहादुर बस्नेतं वीर अस्पताल पिने च्वंगु निगू वासः पसः बन्द याना बिउगु दु । स्वाथ्य मन्त्रालय व औषधि विभागं म्हिगः याःगु निरीक्षणय् सत्यम फर्मा व उपकार सेवा फर्मां म्याद फुइधुंकूगु व दर्ता मजूगु वासः मियाच्वंगु लुइवं पसः बन्द याना बिउगु खः ।

मन्त्री बस्नेतं पसः बन्दया निर्देशन बिसें धयादिल, ‘वीर अस्पताल पिने च्वंगु फार्मेसीं म्याद फुइधुंकूगु वासः मियाच्वंगु व थिकयेक मियाच्वंगु लुल । वासः बांलाक स्टोर यायेमाःथाय् पिने हे त्रिपालं त्वपुयातःगु लुइवं फार्मेसी बन्द यानाः कारबाही न्ह्याकागु खः ।’ मन्त्री बस्नेतं वीर अस्पतालया स्टोरय् दुगु वासः सुचुकाः बिरामीयात पिने च्वंगु फार्मेसीइ न्याकेगु यानाच्वंगु लूगु धासें थ्व झन तःधंगु समस्या जूगु खँ धयादीगु दु ।

अस्पतालया पार्किङ क्षेत्रय् टहरा दयेकाः फार्मेसी चले याःगु बारे अस्पतालया व्यवस्थापनलिसे नं सहलह जुयाच्वंगु दु । वय्कलं शल्यक्रियाया नितिं माःगु व थिकेगु वासः अस्पतालया फार्मेसीइ हे न्याये दइगु व्यवस्था यायेत्यनागु खँ नं कनादीगु दु ।

औषधी व्यवस्था विभागया महानिर्देशक नारायणप्रसाद ढकालं निरीक्षणया झ्वलय् फ्रिजय् तयेमाःगु वासः पिने खुला तयातःगु लूगु खँ कनादीगु दु । स्वास्थ्य विभागं नियमन याना वयाच्वंगु आपालं वासः वीर अस्पताल पिनेया वासः पसलय् लूगु खँ नं धाःगु दु ।