टिकापुर घटनाय् थारुत पुनरावेदनय् वनीगु

येँ- टीकापुर घटनायात कयाः जेल जीवन हनादीम्ह थरुहट आन्दोलनया नेता लक्ष्मण थारुं थःपिं याकनं हे पुनरावेदन अदालत वनेत्यनागु खँ कनादीगु दु । म्हिगः ‘नेपालभाषा टाइम्स’ लिसे खँ ल्हासें झ्वलय् वय्कलं उगु खँ कनादीगु खः ।

टीकापुरया घटना मूलतः राजनीतिक आन्दोलन खःसां नं गुगु मजुइमाःगु घटना जुल उकिं थःपिंत नं दुःख ताःगु खँ कनादिसें वय्कलं घटना लिपा गुगु असहज स्थिति ब्वलन थुकिं थःपिनिगु स्वयां नं राज्यया मू भूमिका दुगु दावी नं वय्कलं यानादिल ।

वय्कलं कैलाली जिल्ला अदालतं न्यंकूगु फैसला पूर्ण मजू धासें थःपिं आः पुनरावेदनय् वनेगु बारे तयारी यानाच्वनागु जानकारी नं बियादिल ।
वय्कलं टीकापुर आन्दोलनया झ्वलय् कैलाली जिल्ला अदालतं जन्म कैद न्यंकूम्ह थरुहट आन्दोलनया न्ह्यलुवा रेशमलाल चौधरी निर्दोष जूगु दावी यासें छम्ह निर्दोष जनप्रतिनिधिया बारे अदालतपाखें गुगु फैसला वल थ्व दुर्भाग्य जूगु बिचाः नं वय्कलं प्वंकादिल ।
रेशम चौधरीं पुनरावेदन याइ कि याइ मखु धइगु न्ह्यसलय् वय्कलं चौधरी निश्चित रुपं पुनरावेदन अदालत वनी धासें उकिया लागिं तयारी समेत जुयाच्वंगु खँ नं कनादिल ।

वय्कलं तत्कालीन इलय् सुशील कोइराला प्रधानमन्त्री जुयाच्वंगु इलय् पुलांम्ह न्यायाधीश गिरिशचन्द्र लाल दासया संयोजकत्वय् नीस्वंगु उच्चस्तरीय छानवीन आयोगया प्रतिवेदन सरकारं आः तक सार्वजनिक मयाःगु खँय् आपत्ति प्वंकुसें उकियात याकनं सार्वजनिक यायेमाःगु माग नं यानादीगु दु । सरकारं उगु प्रतिवेदन आः तक नं सुचुका तःगु धासें राज्य ग्यानाः हे प्रतिवेदन सार्वजनिक मयाःगु दावी नं वय्कलं यानादिल ।

प्रतिवेदन छाय् सार्वजनिक मयाःगु धयागु न्ह्यसःया लिसलय् वय्कलं धयादिल, ‘थुकिं वास्तविक घटना पिहां वइ धकाः राज्य ग्यानाच्वंगु दु । उगु प्रतिवेदन सार्वजनिक जुल धाःसा वास्तविक घटना सार्वजनिक जुयाः आदिवासी जनजातियात स्वइगु राज्यया दृष्टिकोण स्पष्ट जुइ । थुकिं यानाः हे राज्यं उकियात सार्वजनिक मयासे तयातःगु खः ।’

थः जेल जीवनं मुक्त जुइधुंकाः आः जन्मकैदया फैसला न्यंकूपिनिगु छेँजः लिसें नाप लायेगु लिसे पुनरावेदन वनेत तयारी जुयाच्वंगु खँ नं वय्कलं कनादिल ।

सम्बन्धित बुखँ

LEAVE YOUR COMMENTS