हाइकु ख्यःया हाइकु नखः

यल (नेपालभाषा टाइम्स)- नेवाः हाइकु ख्यःया ग्वसालय् जूगु नेवाः हाइगु नखः क्वचाल । थनया कुपन्डोलय् च्वंगु सातोआकि भवनय् जूगु हाइकु नखतय् छगू दर्जनं मल्याक हाइकु च्वमिपिंसं ब्वति कयादीगु खः ।

नेवाः हाइकु ख्यःया कजि सुरेश प्रधानया सभापतित्वय् जूगु ज्याझ्वलय् मूपाहांकथं नेपालभाषा एकेदेमिया चान्सलर यज्ञरत्न धाख्वा झायादीगु खः । मूपाहां धाख्वां त्वाःदेवाय् मत च्याकाः उलेज्या यानादीगु ज्याझ्वलय् सभापति प्रधानं लसकुस यानादीगु खः ।

ज्याझ्वलय् नांजाःम्ह साहित्यकार भूषणप्रसाद श्रेष्ठ, दिव्या ताम्राकार, प्रदीप तुलाधर, रिता महर्जन, अनुप श्रेष्ठाचार्य, विमला शर्मा, ज्ञानेन्द्ररत्न वज्राचार्य, समान्त, राजेश्वरी राजोपाध्याय, मंगला तुलाधर, सुरेन्द्रलाल भुजु, उर्मिला डंगोल, बुद्धरत्न जः, मञ्जुश्री श्रेष्ठ, ज्ञानीदेवी शाक्य लगायतं हाइकु ब्वनाः न्यंकादीगु खः ।
ज्याझ्वलय् वाचन जूगु हाइकुयात कयाः एकेदेमिया सदस्य सचिवलिसें समालोचक डा. पुष्पराज राजकर्णिकार, समीक्षकपिं ध्रुव मधिकःमि व पूर्णकाजी ताम्राकारं समीक्षा यानादीगु खः ।

सामाजिक संजाल फेसबुकपाखें हाइकु ज्याझ्वः न्ह्याका वयाच्वंगु नेवाः हाइकु ख्यः स्वदँ क्यंगु लसताय् उगु ज्याझ्वः जूगु खः ।