पाक्व पुखुद्यां मानन्धरया ध्वाँय् पुजा

येँ (नेपालभाषा टाइम्स)- पाक्व पुखुद्यां मानन्धर सनाः खलःया ध्वाँय् पुजाया लसताय् थीथी व्यक्तिपिंत हनेज्या व सांस्कृतिक ज्याझ्वः जुल । ज्याझ्वलय् मूपाहां बागमती प्रदेशया सांसद बसन्त मानन्धरं ७७ दँ पुलेधुंकूपिं गुथिया दुजःपिंत हनेगु लिसें थुगुसी अप्वः ल्याः हयाः एसईई व १२ तगिं पास जूपिं गुथिया मस्तय्त पदक लःल्हानादीगु खः ।

तःदँ तक सुवाः ज्या यानादीपिं व सांस्कृतिक ख्यलय् च्वनाः ज्या यानादीपिं गुथिया दुजःपिंत नं हनेगु ज्या जूगु खःसा वरिष्ठ गुथियार शान्तबहादुर मानन्धरयात विशेष सांस्कृतिक हनेज्या याःगु खः ।

गुथिया कजि माहिलाकाजी मानन्धरया सभापतित्वय् जूगु उगु ज्याझ्वलय् केन्द्रीय मानन्धर संघया सभापति मनोजकुमार मानन्धर लिसें गुथिया दांभरि बद्रीनारायण मानन्धर, छ्यांज्ये कर्ण मानन्धरपिंसं नं नुगःखँ तयादीगु खः ।

सांस्कृतिक ज्याझ्वलय् गुथिया सांस्कृतिक पुचःया बाजं, म्ये लिसें जुजुकाजी रञ्जित, रत्नशोभा महर्जनपिनि म्ये व राजन शाहीया हुलाप्याखं नं न्ह्यब्वःगु खः ।