थौं एकता मखु, पार्टी स्थापना दिवस जक नापं

एकताय् माधव नेपाल बाधक ?

येँ – नेकपा एमाले व माओवादी केन्द्र दथुइ थौं वैशाख ९ गते पार्टी एकता घोषणा जुइ धकाः तयारी यानातःगु खःसां थ्व घोषणा धाःसा मजुइगु जूगु दु । अथे खःसां पार्टी एकताया सम्भावनायात मस्यंकेगु व जनताय् सकारात्मक सन्देश बीगु लागिं थौं निगुलिं पार्टीया शीर्ष नेतात छथासं च्वनाः नेपाल कम्युनिष्ट पार्टीया स्थापना दिवस धाःसा मंकाः रुपं हे न्यायेकीगु जूगु दु ।

थौं न्हिनय् थनया राष्ट्रिय सभागृहय् नेपाल कम्युनिष्ट पार्टी स्थापना दिवस हनीगु जूगु दु गुकी प्रधानमन्त्री लिसें एमालेया अध्यक्ष केपी ओली व माओवादी केन्द्रया अध्यक्ष पुष्पकमल दाहालं सम्बोधन यानादी । थ्व ज्याझ्वःया ग्वसाः खलः नं निगुलिं पार्टी मजुसे पार्टी एकताया लागिं कुतः यानाच्वंगु ‘एकता संयोजन समिति’ खः ।
थौंया ज्याझ्वःया संयोजन यानादीम्ह एमालेया कार्यालय सचिव कृष्णगोपाल श्रेष्ठं थौं फुसा पार्टी एकताया घोषणा हे याना छ्वयेगु व मफुसा निम्हं नेतातय्त छथाय् तयाः एकताया सकारात्मक सन्देश जूसां बिया छ्वयेगु खँ कनादिल ।

वय्कलं कनादी कथं फयांफछि थौं हे एकताया घोषणा याना छ्वयेगु धकाः म्हिगः बहनी तकं कुतः जुयाच्वंगु खः । एमाले अध्यक्ष केपी ओलीं थौंया महत्वपूर्ण न्हिया अवसरयात त्वःफिके मते धकाः निर्देशन बियादीगुलिं फयांफछि थौं हे एकता घोषणा यायेगु कुतः जुयाच्वंगु जानकारी नं वय्कलं बियादिल ।

माओवादी अध्यक्ष दाहालं धाःसा एकताया लागिं आपालं खँ मिले याये ल्यं दनिगु जूगुलिं थौंया सभाय् पार्टी एकता जुल, बाँकी खँ लिपा मिले याये धकाः घोषणा यायेगु तकया प्रस्ताव तःगु खँ सीदुगु दु । तर एमालें धाःसा एकता जुल धकाः निम्हं शीर्ष नेतातय् हस्ताक्षर दुगु विज्ञप्ति पिकयाः जक अज्याःगु घोषणा याये मालीगु खँ धाःगु दु गुकियात दाहालं धाःसा स्वीकार याःगु मदुनि ।

एकताय् माधव नेपाल बाधक ?

एमाले व माओवादी एकता जुइ मफयाच्वंगुया छता कारण एमालेया वरिष्ठ नेता माधव नेपाल नं खः धया हःगु दु । एकता लिपा एमाले नेता केपी ओली पार्टी अध्यक्ष जूसां महाधिवेशन लिपा माओवादीया नेता पुष्पकमल दाहाल अध्यक्ष जुइ धकाः निम्ह शीर्ष नेतातय् दथुइ जूगु सहमतियात माधव नेपालं विरोध याःगु कारणं एकता लिबानाच्वंगु खँ सूत्रं धाःगु दु । नेता नेपालं एकता जुयाः महाधिवेशन जुइगु गबले गबले तिनि आः हे अध्यक्ष थ्व जुइ धकाः किटान याये फइ मखु धकाः पार्टीइ स्पष्ट खँ तयादीगु दु । दाहाल धाःसा महाधिवेशन लिपा थःत अध्यक्ष जुइगु निश्चित खःसा जक एकता यायेगु पक्षय् दुगु खँ सूत्रं धाःगु दु ।