ने. सं. ११४३ तछलाथ्व द्वादशी -

उफ् ! ग्यासें वइ !

वर्तमान प्रधानमन्त्री बेलायत भ्रमणं लिहां वइ । खुलासा याइ । जिगु व प्रचण्डया हस्ताक्षर दुगु पौ च्वयाः सम्बन्धित थासय् एमसीसी स्वीकार यानागु सुचं बी धुन । तर । प्रम देउवां थज्याःगु खुलाया छु याइ भाजु प्रचण्ड प्रधानमन्त्रीया थ्व धापू गलत खः । सत्य मखु । जिं थज्याःगु आशयया गुगुं पत्रय् हस्ताक्षर यानागु मदु । तत्काल खण्डन याइ । थन एमसीसी बारे चर्चा जुइत्यंगु मखु । देउवाजुया खुलासा व भाजु प्रचण्डया खण्डनं देय्या राजनीतियात गुकथं थुइकेगु ? गुगु विशेषनं थौंया राजनीतिक परिस्थितियात छाय्पीगु ? जिज्ञासा व्यक्त यानाच्वनागु खः ।

धाइ । देउवा व प्रचण्ड थौंया गठबन्धन सरकारया निर्णायक व्यक्तित्व खः । शासन सत्ताय् तःधंगु पकड दुपिं खेलाडीत खः । तर आश्चर्य ! छगू हे गठबन्धनयात हाँके यानाच्वंपिं निम्ह सारथीतय् वक्तव्यय् गथे अन्तरविरोध खनेदत ? गठबन्धनया सारथीया हिसाबं निम्हेसिया दथुइ गथे थज्याःगु विपरित खँत पिहां वल ? थौंया राजनीतियात थुकिं तःधंगु रहस्यया विषय याना बिउगु दु । प्रधानमन्त्री थेंज्याःम्ह देय्या उच्च पदय् च्वनाच्वंम्ह व्यक्तिं धाःगु खँयात झूठ गथे यानाः खंकेगु ? छथ्वः मनूतय्सं न्ह्यसः तइ ।

अथे हे देशय् गठबन्धन सरकारया प्रमुख योजनाकार भाजु प्रचण्डं याःगु खण्डनयात नं हलुकाकथं कायेगु स्थिति मदु । देय्या जिम्मेवारी पदासिन नेतातय्सं देय्या गम्भिर विषयय् थःथःगु धारणा स्पष्ट यायेमाः । वाक चतु¥याइँ छ्यलाः जनतायात च्याम्पतियात थें चाःहिइकाः रमिता यायेत स्वये मजिउ । थुकिं देय्या राजनीतिं तःधंगु मूल्य चुके याये मालेफु । इलय् व्यलय् छखेर एमसीसी बारे भाजु प्रचण्डं राष्ट्रिय सहमतिया खँ हइ । मेखेर प्रचण्डया दलया अधिकांश नेतातय्सं एमसीसीयात गुगुं हालतय् समर्थन याये मफइगु खँ व्यक्त यानाच्वनी । जब थःगु दलया अधिकांश नेतातय्सं एमसीसी स्वीकार्य मजुइगु खँ गुगुं खोल मतसे प्वंकी, अले व हे दलया शीर्षस्थ नेता ‘राष्ट्रिय सहमति’या खोल तयाः थःगु धारणायात रहस्यमय याना क्यनी । एमसीसीयात कयाः स्वयं सत्तासिन नेतातय्सं थःथःगु पहलं भजन हालाच्वंगु दु ।

नेता बाबुरामं धाइ एमसीसी नेपालं स्वीकार यायेमाः । याःसा नेपाः सिंगापुर थें झः झः धाइ, मयाःसा अफगानिस्तान थें ध्वस्त जुइ । प्रधानमन्त्री देउवां ला सदनं अनुमोदित जुइ । शंका यायेम्वाः । धुक्क जु धाइ । माधवजुया समाजवादी दलया नेता झलनाथ खनालजुं एमसीसी देय्या हीतया पक्षय् मदुगु खँ व्यक्त याइ । उगु हे दलया नेतृ रामकुमारी झाँक्रीं एमसीसीया पूर्ण समर्थन याना क्यनी । देय्यात हाँके यायेगु सत्ता थौं गठबन्धन सरकारया ल्हाती वःगु दु । गठबन्धन थीथी दलत जानाः निर्मित सरकार जूसां नाःनाः अन्तरविरोधी लक्ष्यत ज्वनाः गठबन्धनं देय् व जनतायात अलमलय् यानाच्वने मजिउ ।

छगू दल अले छगू हे गठबन्धन दुने पृथक पृथक रायम बियाः जनतायात भ्रम जालय् लकेगु नाटक मञ्चन याना च्वने मजिउ । थज्याःगु भ्रम जालया खेलं गठबन्धनया नियति छु जुइ ? मनूतय्सं थौंया गठबन्धन सरकारयात पेचकसत मदुगु यन्त्र खंके माली । गुकुन्हु थ्वया संरचना छताछुल्य जुयाः छरपष्ट जुइगु खः । दुःखया खँ जुइ ।

थौं देय् राजनीतिविहीन अवस्थाय् लाः वयाच्वंगु दु । देय् असफल राष्ट्रय् परिणत जुइ ला ? देशवासीत चिन्तित जुइ मालाच्वंगु दु । देय् थौं भाग्यया भरय् । गय् गुकथं थ्व संचालन जुयाच्वंगु दु ? थौं देय्या महत्वपूर्ण अ·त फुक्क ध्वस्त अवस्थाय् । कार्यपालिका उखेंथुखें मुनातःगु कुचाकुचात स्वानाः दयेकातःगु मूर्ति थें ! तसकं फय् जक वःसां गल्र्यामगुर्लुम दुनीला ? बेठेगान । व्यवस्थापिका चलखं ल्हाःगु छेँ थें ! न्यायपालिका भुखाचं दुंगु देगः थें ! देय् संचालनया फुक्क यन्त्रत थौं विपदं ग्रस्त । क्षतिग्रस्त । देय् थौं आध्यार्तित अवस्थाय् । जनताया तःधंगु छटपटी । थज्याःगु घोर विपदया घडी कथिन राजनीतिक नेतातय्सं छम्हं मेम्हेसित हाँक बियाच्वनी ‘छ …. हत्यारा ….! छंत निर्मूल यानाबी ।’ मेम्हेसिनं विपक्षीयात चुनौति बी ‘अय्, ज्यानमारा होशियार ! छंत सिधयेका बी !’

थौं देय्या राजनीतिया ख्यलय् देय्या राजनेतात ‘हत्यारा, ज्यानमारा’ धकाः परस्परय् संबोधित जुइ । थज्याःगु आरोप, प्रत्यारोपं देय्या राजनीति थौं गुञ्जायमान जुयाच्वनी । देय्या नियति धाथें थौं राजनीतिक अपराधीतय् ल्हाती लाः वंगु खःला ? उफ् ! ग्यासें वइ !