ने. सं. ११४४ कौलाथ्व षष्ठी -

स्वदँया दुने कम्युनिस्टतय्गु स्खलन

विजय स्यस्यः

नेकपा एमालेया नायः केपी शर्मा ओलीया पुचलय् दुने थिङ्कट्याङ्क कथं नां वइम्ह व राष्ट्रिय राजनीतिइ नं ल्हाः दुम्ह माने यानातःम्ह शंकर पोखरेल लुम्बिनी प्रदेशया मुख्य मन्त्री पदं राजिनामा बियाः बहिर्गन जूगु दु । वंगु वैशाखय् हे अल्पमतय् लायेधुंकूगु हुनिं राजिनामा बिउगु जूसा पोखरेलं थःगु राजनीतिक उचाइ कायम यानातयेफइगु खः तर बहुमत सांसदत प्रदेश प्रमुखया निवास पिने नाराबाजी याः वनं थःपिं दक्कय् तःधंगु दलया नेता धकाः धयाः प्रदेश प्रमुखयात हे थःगु थासय् सःता सपथ ग्रहण याःगु व आः वयाः अविश्वासया प्रस्तावया सामना मयासें प्रदेश प्रमुखयाथाय् वनाः राजिनामा बिउवंगुलिं वय्कः राजनीतिक हाइट व नैतिकता चय्ट जुल धकाः धाइपिं मनूत ग्वाःग्वाः पिहाँ वयाच्वंगु दु ।

२०७४ सालया चुनाव जूगु इलय् दाङया निर्वाचन क्षेत्रय् माओवादीया कृष्ण बहादुर महरायात सिट त्वःताबीमाःगु हुनिं शंकर पोखरेल प्रदेश सभाय् दनाः मुख्य मन्त्री जुइगु लँपुइ वंगु खः । एमालें माओवादीयात ४० प्रतिशत सिट त्वःताबिउगु व शंकर पोखरेल थुज्वःपिं मनूतसें तकं सिट त्वःतूगु धाइगु ला केपी शर्मा ओलीयात प्रधानमन्त्री दयेकेगु एक सूत्रीय अभियान जक खः धकाः धाइपिं मनूतय्गु खँ न्यनेगु खःसा आः पोखरेलया थ्व बहिर्गमन नं व हे धार न्ह्यानावंगु खँया हे परिणति जक खः ।

केन्द्रया राजनीतिइ ल्हाः दुम्ह पोखरेल केन्द्रय् थः नेतायात प्रधानमन्त्रीइ हयेत प्रतिनिधि सभा त्वःतेत वाध्य जुल धाःसा आः व हे केन्द्रीय राजनीतिइ वःगु समीकरणया हिउपाःया हे शिकार जुल । थ्व छगू चर्चा यायेबहःगु सवाल जूगु दु ।

थ्व छगू सवाल खः धाःसा मेगु नेकपा धकाः दुबलय् नेपाःया केन्द्रय् स्वब्वय् निब्वया सरकार अले ७गू प्रदेश मध्ये ६ गू प्रदेशया सरकार थःगु यानाः देय्या राज हे थःगु ल्हाःतय् लाकातःपिं मनूत आः निगू प्रदेशया सरकार जक ल्हाःतय् लाका च्वनाच्वंगु खनाः नेपालय् कम्युनिस्टतय्गु हे अवनति जूगु चर्चा याइपिं नं उत्तिकं पिहाँ वयाच्वंगु दु । केन्द्रय् अविश्वासया प्रस्ताव तयेत २५ प्रतिशत हे सिट मदुगु नेपाली काँग्रेसयात बाजी मारे यायेगु ज्या ला गण्डकी प्रदेश पाखें जूगु खः । गण्डकी प्रदेशय् कृष्ण चन्द्र पोखरेल नेपाली मुख्य मन्त्री जुइवं मत च्याकाः मालेमाःगु काँग्रेस उदय जुल धकाः तकं मनूतसें बय्बय् याःगु थुथाय् लुमंके बहः जू ।

थगुने केपी शर्मा ओलीं भारतीय जासुसी संस्था रअया नायः सामन्त गोयल नाप लायेधुंकाः देय्या राजनीतिइ छुं ई तक वय्कः ओली हे नेपाःया जंगबहादुर थें खनेदुसां कम्युनिस्टतय्गु नितिं व स्वयं ओलीया नितिं नं थ्व भेटघाट प्रत्युत्पादक हे साबित जूगु दु । नेपाली काँग्रेसया नायः पश्चिमा लबीया जूगु हुनिं नं नेकपा दयेकाः नेपालया राजनीतिइ कम्युनिस्टतय्त हावी यायेत भारत सहमत जुल धाइपिं नं उबलय् पिहाँ वःगु खः । तर नेपालय् काँग्रेसयात टेरे मयाःपिं, राजावादीतय्त हयेमजिउ धकाः धाइपिं व नेकपा धकाः एमाले माओवादी मिले जूगु खँयात समर्थन यानाच्वंपिं ला भारतया एसडी मुनि, श्याम शरण इत्यादिपिं खः । थुपिं भारतय् काँग्रेस आइ नाप सत्तीपिं व जुजु विरोधीत खः । तर भारतय् संस्थापन पक्ष जुयाच्वंपिं ला भाजपा खः । थ्व हे अवस्था जूगुलिं यानाः नेकपा दुनेया आन्तरिक राजनीतिइ भारतया गुगुं पक्ष मखु, चिनिया राजदूत हावी जू वन ।

थथे जूबलय् भारतलिसे सम्बन्धित नेपाःया सवालय् नेपाःया प्रधानमन्त्रीं राष्ट्रवादी अडान कयाः भारतं काश्मिरयात केन्द्र शासित क्षेत्र दयेकाः पिकाःगु नक्साया सम्बन्धय् जनस्तरय् प्रतिक्रिया जुल धाःसा अनया रक्षामन्त्री राजनाथ सिंहं कैलाश मानसरोबर वनेगु लँपु उद्घाटन याःबलय् नेपालं लिपुलेख, लिम्पियाधुरा व कालापानी नेपाः दुने लाकाः नक्सा पिकाल । जनस्तरया राष्ट्रवादी मागयात नेपाःया ओली सरकारं सम्बोधन यात अले उगु हे कथं नेपाःया निसानी छाप संशोधन यायेत संविधान संशोधन यात । प्राविधिक रूपं नेपाःया निसानी छाप संशोधन यायेत जक संविधान संशोधन यायेमाःगु खःसां थुकिं नेपाःया संसदं नं नेपाःया च्वकालूगु नक्सा पास याःगु ठहर जुल ।

भारतं नेपालय् छुं नियन्त्रण हे यायेमफुबलय् अन च्वंपिं मनूत हरबराय् चाइगु स्वाभाविक खः । उकिसनं न्हापा नाकाबन्दी यानाः नेपाःयात भड्के यायेगु ज्या यात धकाः धाइपिं भारतीय विपक्षी दलं भारतीय संस्थापनपक्षयात क्वाक्वा त्यानाच्वंगु नं झीसं स्वयाः खना वयाच्वंगु हे खः । मेखे सत्तारुढ नेकपा दुनेया ल्वापु चिनिया राजदूतं मिले यात धकाः बुखँ पिहा वःबलय् ला भारत ला वाथावाथा कनीगु हे जुल ।

अन्ततः चिनिया राजदूतं नेकपा दुनेया विवाद ज्यंकेत प्रधानमन्त्री छगू पदं राजिनामा बिइत नं तयार जुइमा धकाः प्रचण्डपिनिगु भर्सन ओलीयात न्यंकाबिउबलय् ओली भड्के जुयाः चिनिया खँ मन्यंसें भारतलिसे लाइन मिले याः वंगु बुखँ पिहाँ वल । थ्व लिपा हे सामन्त गोयल, स्थल सेनाध्यक्ष नरभाने व विदेश सचिव हर्षबद्र्धन श्रृंगला नेपाः वःगु खः । ओली उबलय् स्पष्टतः प्रचण्डयात टार्गेट दयेकाः भारतनाप ग्वाहालि फ्वंगु खँ पिहाँ वःगु खः । वयांलिउ भारतीय संस्थापन पक्षया खँ न्यनाः जुजुयात हयेत नं कुतः जूगु खँ नं पिहाँ वल । थ्वहे झ्वलय् घटनाक्रम न्ह्याः वनाः न्याम्ह पूर्व प्रधानमन्त्रीपिसं विदेशी हस्तक्षेप मजिउ धकाः भारतयात हे इंगित यानाः वक्तव्य पिकाःगु खँ नं थन न्ह्यथने बहः जू ।

नेपालय् शेर बहादुर देउवा प्रधानमन्त्री जुइधुंकाः तकं भारतं बधाई मबिउगु व विश्वासया मत कायेधुंकाः जक बधाई बिउगु खँ थन न्ह्यथने बहः जू । आखिर आः ला भारतयात नं नेपालय् सु स्थापित जुयाच्वंगु दु, सु सरकार दु वयालिसे हे ज्या कायेमाःगु ला खः । थुकिया नितिं नेपालय् थःपिं स्थापित जुइत शेर बहादुर देउवायात न्ह्यःने हयाः ज्या सनेगु ज्याय् प्रचण्ड व माधव कुमार नेपालं हे आपाः मिहेनत याःगु खनेदु । थुकिं थ्व इलय् नं ल्वापु ला नेकपा धकाः जूपिं कम्युनिस्टतय्गु हे खः धाःसा प्रधानमन्त्री जुयाच्वंसां शेर बहादुर देउवा धाइम्ह मोहरा जक खः । प्रचण्डं हे धयाः न्युनतम साझा कार्यक्रमय् एमसिसीया खँ मतयागु धकाः शेर बहादुर देउवां न्ववाःगु खं यानाः नं प्रचण्ड हे निर्णायक जुयाच्वंगु खँ स्पष्ट जू ।

तर नेपालय् कम्युनिस्टतय्गु दथुइ थ्व हे ल्वापु न्ह्यानाच्वन धाःसा आः निर्णायक मजूसां कन्हय्या दिनय् काँग्रेस निर्णायक जुइफु । थ्व खँयात नेपाःया सकल कम्युनिस्टतय्सं वाः चायेकेमफुत धाःसा आः वइगु चुनावय् जनता नं कम्युनिस्टया हे पक्षय् दइ धाइगु मदु, छाय्कि कम्युनिस्टतय्त स्वब्वय् निब्व बहुमत बिउगु कम्युनिस्टतय्सं हे बचे यायेमफुगु खः ।