द्वैध नागरिकता कानुन विवादय्, गैरआवासीय नेपाःमितय्त झाँक्रीया लिसः

येँ (नेपालभाषा टाइम्स)÷विदेशय् च्वनीपिं नेपाःमि नागरिकतय्त नेपाःया नं नागरिकता काये दइगु अधिकारया नापनापं राजनीतिक अधिकार समेत बीमाः धकाः जूगु मागयात नेकपा (एकीकृत समाजवादी) या नेता लिसें पुलांम्ह मन्त्री रामकुमारी झाँक्रीं कडा ढंगं लिसः बियादीगु दु ।

म्हिगः येँय् गैरआवास नेपाःमितय् सम्मेलनयात सम्बोधन यासें वय्कलं नागरिकताया अधिकार धइगु मानव अधिकार थें विश्वव्यापी अधिकार जुइ मखु धासें विदेशया नागरिकता काये धुंकूपिं नेपाःमियात नेपाःया राजनीतिइ ब्वति कायेगु अधिकार दइ मखु धकाः लिसः बियादीगु खः ।

उगु ज्याझ्वलय् न्ववाःपिं छुं गैर आवासीय नेपाःमि न्ह्यलुवातय्सं थःपिंत नागरिकताया अधिकार जक बियाः राजनीतिक अधिकार मबिउ धासें नेपाः सरकारया कडा आलोचना याःगु खः । उकियात हे लिसः बिसें नेता झाँक्रीं थ्व खँ धयादीगु खः ।

वय्कलं विदेशया नागरिकता कयाच्वंत्तले नेपालय् राजनीति याये दइ मखु धासें राजनीति यायेगु खःसा विदेशया नागरिकता त्वःताः नेपालय् लिहां वयाः चुनाव ल्वाः वा धकाः नं हाथ्या बियादीगु खः । लिसें वय्कलं विदेशय् वनाः छं भचा ध्यबा कमे यायेवं नेपाः व नेपाःया नेतातय्त ब्वः बीगु गैर आवासीय नेपाःमितय् ज्यायात नं आलोचना यानादीगु खः ।

झाँक्रीया थ्व धापू सार्वजनिक जुइवं थुकिया पक्ष व विपक्षय् वहस नं शुरु जूगु दु । सामाजिक सञ्जालय् धाःसा झाँक्रीयात आपालं नेपाःमितय्सं समर्थन यानाः ‘बांलाक लिसः बियादिल’ धकाः समर्थन याना हःगु दु । गैर आवासीय नेपाःमितय्सं नेपाः व विदेश निथासं सुविधा कायेगु ज्या यानाच्वंगु व नेपालय् लगानी यायेगु धकाः न्ह्याक्व हे हल्ला याःसां हल्ला याः थें ज्या धाःसा मयाःगु धकाः नं आलोचना जुयाच्वंगु दु । सरकारं छुं न्हि न्ह्यः तिनि गैरआवासीय नेपाःमियात नेपाःया नं नागरिकता काये दइ कथंया कानुन दयेकूगु खः ।

नेपालभाषा टाइम्स

च्वमिया मेमेगु

• वतु त्वालय् दन्त शिविर
• पासा पुचः गुथि लन्दनया न्हूधाः
• ज्यापु समाजया निर्वतमान नायः तीर्थलालया अबु मंत
• ‘मौसम पूर्वानुमानयात गम्भीर रुपं मकाःगुलिं यक्व क्षति जूगु खः’ – वरिष्ठ माैसमविद् मणिरत्न शाक्य
• नखःचखःया दिं कायेत झीगु संस्कृतिया मौलिक परम्परा म्हसीकेमाल