राजपा समानुपातिक धलःया समस्या

येँ,  निर्वाचन आयोगं प्रदेशसभाय् समानुपातिकपाखेया उम्मेदवार धलः कानून कथं सच्चे मयात धाःसा राष्ट्रिय जनता पार्टी (राजपा) या प्रदेश सांसदतय् नां खाली यानाः हे लिच्वः सार्वजनिक यायेगु ख्याच्वः बिउगु दु ।
राजपां प्रदेशसभाय् समानु–पातिकपाखें त्याःपिं सांसदतय् नां छ्वया हःगुली समावेशी मजुल धासें धलः मिले याना हयेत निक्वः पौ च्वयेधुंकूसां राजपां धलः मिले यानामहःगु खः ।
आयोगया ख्याच्वः लिपा राजपा अध्यक्ष मण्डल उगु धलः मिले यायेत मंगलवाःनिसें सहलह ब्याकाच्वंगु दु ।
निर्वाचन आयोगं राजपाया धलखय् समानुपातिक उम्मेदवारया प्राथमिकता क्रम मिले मजूगु व क्लस्टर सम्बन्धी नियम नं नाला मकाःगु खँ धाःगु दु । निक्वःतक पौ छ्वयेधुंकागुलिं आः नं मिले याना महल धाःसा राजपाया दुजःतय् नां खाली हे यानाः लिच्वः पिकायेगु निर्णय जुइधुंकूगु खँ आयोगया समानुपातिक निर्वाचन इकाइया अधिकारी गीताप्रसाद तिमिल्सिनां कनादीगु दु ।
राजपाया मू नेतात थम्हं छ्वयापिं मनूतय् नां चीके मखु धकाः अडान कयाच्वंगुलिं समानुपातिक धलः मिले यायेत समस्या जुयाच्वंगु खः । राजपाया नेता मनिष सुमनं धयादीगु दु, ‘जिमित भोट बिउपिं मधेसी समुदायया मनूत खः, तर गैर मधेसीयात ल्ययेमाःगु नियम पूवंकेबलय् जिमित मछिनाच्वंगु दु । अय्सां मिले यायेत स्वयाच्वनागु दु ।’
मेखे राजपां धलः मिले यानामहःगुलिं आयोगयात अन्तिम लिच्वः सार्वजनिक यायेगु मिति क्वःछीत तकं थाकुयाच्वंगु दु ।

सम्बन्धित बुखँ

LEAVE YOUR COMMENTS