कुलांभुलु अजिमा द्यःया ल्वहंपौ उलेज्या

येँ- येँ महानगरपालिका १८ वडाय् च्वंगु कुलांभुलु अजिमा (रक्तकाली) देगः लागा व भवन निर्माण सम्पन्न जूगु लसताय् छगू ज्याझ्वः जुल । १८ वडा टोल सुधार समितिया ग्वसालय् देगः लागा व भवन निर्माणया निंतिं आर्थिक व जिन्सी ग्वाहालि यानादीपिनिगु नां धलः दुगु ल्वहंपौया उलेज्या नं याःगु खः ।

समितिया अध्यक्ष महेन्द्र शाहीया सभापतित्वय् जूगु ज्याझ्वलय् मूपाहांकथं झायादीम्ह येँ महानगरपालिकाया उपप्रमुख हरिप्रभा खड्गी श्रेष्ठं उगु ल्वहंपौया उलेज्या यानादीगु खः ।

ज्याझ्वःया कजि सरोजकुमार श्रेष्ठं लसकुस यासें कुलांभुलु अजिमा द्यःया बारे म्हसीका बियादीगु खःसा समितिया दुजः बिजु श्रेष्ठं समितिया गतिविधि बारे जानकारी बियादीगु खः ।

मूपाहां हरिप्रभा खड्गी श्रेष्ठं सम्पदा संरक्षणया निंतिं माक्व ग्वाहालि यायेत थःपिं न्ह्याबलें तयार दुगु खँ कनादिसें सम्पदा संरक्षणया ज्याय् त्वाःबहाःयापिं हे न्ह्यज्यायेमाःगु खँय् बः बियादिल । जनसेवा प्रहरी प्रभागाया प्रमुख डिएसपी डि.बि. मल्लं शान्ति सुव्यवस्था सुरक्षा बीत थःपिं न्ह्याबलें तयार दुगु खँ कनादिल ।