सरकारी ज्याकुथिइ भौतिक दूरी कायम मजू

येँ – नेपाल सरकारं भौतिक दूरी कायम यानाः सरकारी ज्याकू चायेकेगु धकाः निर्णय यायेधुंकाः थीथी सरकारी ज्याकू चायेकेगु क्रम शुरु जूसां नं भौतिक दूरी कायम यायेगुलि धाःसा सचेत मजूगु खनेदत ।

वंगु असार १ गतेनिसें सरकारी ज्याकू चाःगु खःसां सर्वसाधारण जनतां धाःसा सरकारया निर्देशनयात उल्लंघन याःगु खनेदु। आपालं धयाथें सरकारी ज्याकू चाःसां नं मनूत हुलमुल जुइक मवःसां नं छुं छुं सरकारी ज्याकुथि धाःसा हुलमुल जुयाच्वंगु खंकेफु। थ्वहे झ्वलय् यलया एकान्तकुनाय् च्वंगु यातायात व्यवस्था कार्यालय नं मनूत हुलमुल जुइक च्वनाच्वंगु खनेदु ।

यातायात व्यवस्था विभागं भौतिक दूरी कायम यायेमाः धकाः चिं तयातःगु दुसा छुं छुं मनूत उगु चिंया दुने हे च्वनेगु यानाच्वंसां आपालं मनूत उकियात उल्लंघन यानाच्वंगु खनेदु। यातायात कार्यालय दुहां वने न्ह्यः थर्मल गनं ज्वरो नापे यायेगु ज्या यानाच्वंगु दु ।