विश्व बैंकय् मुद्दा लाःसां सुख्खा बन्दरगाहा दयेकाच्वन

येँ (नेपालभाषा टाइम्स) – च्वबहालय् दयेकेत्यंगु सुख्खा बन्दर गाहाया विरोध यासें स्थानीय जनतां थ्व थाय्यात सांस्कृतिक पर्यटकीय क्षेत्र दयेकेमाः धकाः सः थ्वयेकाः निरन्तर आन्दोलन याना वयाच्वंगु अवस्थाय् सुक्खा बन्दरगाहा दयेकेगु ज्या धाःसा बुलुहुँ न्ह्यानाच्वंगु खँ सीदुगु दु ।

स्थानीय जनतां सुक्खा बन्दरगाहाया विरोध यासें विश्व बैंकय् मुद्दा तयातःगु दु। तर उकिया बारे अध्ययन यायेत वयेमाःगु पुचः कोरोना भाइरस संक्रमणया कारणं वयेफयाच्वंगु मदुनि । थ्वहे अवस्थाय् लाकाः थन सुख्खा बन्दरगाह धाःसा दयेकेगु ज्या न्ह्याना हे च्वंगु दु । चोभार संरक्षण समितिया अध्यक्ष पञ्चलाल महर्जनं ‘नेपालभाषा टाइम्स’ यात कनादीगु दु, ‘जिमिसं विश्व बैंकय् उजुरी तयेधुंकाः उकियात कयाः छानविन यायेत इन्स्पेक्सन प्यानलया दुजःपिं वयेगु तयारी यानाच्वंगु दु, तर कोरोना संक्रमणया कारणं वयेफयाच्वंगु मदु । तर थ्व हे मौकाय् लाकाः थन बन्दरगाह दयेकेगु ज्या धाःसा मदिक्क न्ह्यानाच्वंगु दु ।’

अध्यक्ष महर्जनया कथं कोरोना संक्रमणया प्रभाव मदयेवं बैंकया पुचः स्थानीय स्तरय् अध्ययन यायेत वइगु जुयाच्वंगु दु । २०७६ साल माघय् स्थानीय वासिन्दाया विरोधया दथुइ प्रधानमन्त्री केपी शर्मा ओली द्वःछि स्वयां अप्वः सुरक्षाकर्मी छ्यलाः सुक्खा बन्दरगाहाया शिलान्यास यानादीगु खः ।

भाजु महर्जनया कथं बैंकया प्रतिनिधि नेपाः वयाः अनुसन्धान यायेत समस्या जूसां मेगु थीथी कथं अनुसन्धान यानाच्वंगु दु। सरकारया थुगु परियोजनाय् विश्व बैंकं १ अर्ब ५७ करोड तका लगानी याःगु खः । विश्व बैंकय् उजुरी तयेगु झ्वलय् सुक्खा बन्दरगाह परियोजनां नेवाः लगायत फुक्कं आदिवासीया म्हसिका लिसे आदिवासी जनजातिया अधिकार हनन जुइ धासें उकियात पनेमाःगु माग याःगु खः । उकथं हे उगु परियोजनां च्वबहाः क्षेत्रया ऐतिहासिक, धार्मिक व सांस्कृतिक सम्पदायात नं लिच्वः लाइ धासें परियोजनाय् लगानी मयायेत उजुरी तःगु खः । उगु हे उजुरी कथं विश्व बैंकया बोर्ड बैठकं उकियात कयाः छानविन यायेगु निर्णय याःगु खःसा उगु निर्णय कथं छानविन यायेत विश्व बैंकया प्रतिनिधि नेपाः वयेगु तयारी याःगु खः ।

हिमाल सिमेन्ट कारखाना बन्द जुइधुंकाः सरकारं उगु थासय् अन्तर्राष्ट्रिय प्रदर्शनी स्थल दयेकेगु धकाः योजना दयेकूगु खः । तर आकाझाकां अन सुक्खा बन्दरगाह दयेकेगु योजना हयेवं स्थानीय वासिन्दा विरोधय् कुहां वःगु खः । वातावरणविद्पिसं नं अन दयेकेगु सुक्खा बन्दरगाहाया कारण स्वनिगःया वातावरणय् लिच्वः लाइगु खँ धासें सुक्खा बन्दरगाहा दयेके मजिउगु सुझाव बियाच्वंगु दु ।